Wednesday, September 30, 2009

[තොටගමුවේ හිමියන්ගේ ජනප්‍රවාද] ගුරු හිමියන්ට බළල් වසුරු කැවීම


කට්ටිය බලයි මොකද්ද බොලේ මේ කියල. 
මේක තොටගමුවේ ශ්‍රී රාහුල හිමියන් ගැන තියෙන ප්‍රවාදයක්. අහගන්නකො එහෙනම්. 
මේක රාහුල හාමුදුරුවො පොඩි කාලෙ වෙච්චි දෙයක්. 

තොටගමුවේ රාහුල හාමුදුරුවන්ගෙ ගුරු හාමුදුරුවො තමා වීදාගම මෛත්‍රී හාමුදුරුවො. මහණ උනාට මේ පොඩි හාමුදුරුවන්ගෙ දඟ වැඩ නම් තාම එහෙමමයි. 
ඔන්න ඉතින් රාහුල පොඩි හාමුදුරුවො දවසක්දා බෝ මළුව අමදිනකොට කවුරු හෝ දායකයෙක් දමල ගිය චූටි පූස් පැටියෙක් දැක්ක. ඉතින් පොඩි හාමුදුරුවන්ටත් හරි සතුටුයි, මොකද කළේ කන්න බොන්න දීල හදා වඩා ගත්ත.  
හැබැයි ඉතින් ලොකු හාමුදුරුවො මේකට කැමති නෑ, මොකද මේ පූස් පැටියගෙන් ලොකු හාමුදුරුවන්ට හරියට කරදර, හැමතැනම රිංගනව, හැමතැනම ජරා කරනව, හාමුදුරුවන්ට භාවනා කරන්නත් නෑ හරියකට. කාලයක් යනකොට ලොකු හාමුදුරුවන්ට මේ පූස් පැටියව දකින එකත් තිත්ත උනා. ගුරු හාමුදුරුවො පොඩි හාමුදුරුවන්ට කරුණාවෙන් කියල බැලුව, මොන. පොඩි හාමුදුරුවන්ට ගානක්වත් නෑ. 
තව ටික කාලයක් යනකොට ගුරු හාමුදුරුවන්ට මේ පූස් පැටියව දකිනකොට හොඳටම තරහ යනව. අන්තිමට තරහ ඉවසගන්න බැරුව මොකද දන්නවද ගුරු හාමුදුරුවො කළේ? කතා කළා පොඩි හාමුදුරුවන්ට. කිව්ව මෙන්න මෙහෙම, 
"රාහුල, නුඹගේ බළල් පැටවා.. අදම උපාසක උන්නැහට දීපන්. එහෙම නැතිව හේ එහෙම බණ මඩුවේ වසුරු දමා තිබුණොත් ඒ වසුරු සේරම උඹට කව්වනවා".
අනේ අපෝයි වෙච්චි දෙයක්. ගුරු හාමුදුරුවො එහෙම කිව්වම පොඩි හාමුදුරුවන්ට හොඳටම බය හිතුන, ලොකු හාමුදුරුවො එහෙම කිව්වෙ එවෙලෙ තිබ්බ තරහට උනත් ඒක එහෙමම වෙනව කියල පොඩි හාමුදුරුවන්ට හොඳටම විශ්වාසයි. 
ඒ උනාට මොකද කරන්නෙ, ඌව යවන්නත් දුකයි, ඒ මදිවට කොච්චර කළත් ඌ පොඩි හාමුදුරුවන්ගෙ පස්සෙමයි. මොකද කරන්නේ කියල දැන් හාමුදුරුවො කල්පනා කළා. 
ආව හොඳ අදහසක්. පොඩි හාමුදුරුවො උපාසක තැනට කියල හකුරු මුලකුයි, තල මුලකුයි ගෙන්න ගත්ත. ඒව කලවම් කරල හොඳින් අඹරල ගුලි හදල තියල නිදාගත්ත. උදේ පාන්දරම අවිදි වෙච්ච පොඩි හාමුදුරුවො, බණ මඩුවෙ තිබ්බ සියළු වසුරු අයින් කරල අර හදාගත්තු ගුලි වසුරු වගේ පේන්න තිබ්බ. 
මොකද උනේ කියල හිතා ගන්න පුළුවන්නෙ? උදේ අවදි උනු ගුරු හාමුදුරුවො ගියා බලන්න, පොඩි නම කිව්ව විදිහට කරලද කියල. දැක්ක දෙයින් ගුරු හාමුදුරුවො හොඳටම කෝප උනා. 
මොකද්ද දැක්කෙ, වෙනදටත් වඩා වසුරු බණ මඩුව ඇතුළෙ. ගුරු හාමුදුරුවො කතා කලා පොඩි හාමුදුරුවන්ට, බැන්න හොඳට, අණ කළා ඔක්කොම වසුරු ටික කන්න. අනේ ඉතින් පොඩි හාමුදුරුවොත් දොළොස් අවුරුද්දක් හාමතේ හිටිය වගේ ඔක්කොම වසුරු ටික වැළඳුව.  
"හපෝයි, මේක නම් මනුස්ස පුතෙක් නෙමෙයි" කියල හිතමින් ලොකු හාමුදුරුවො එතනින් ඉවත් වෙලා ගියා.
එතනින් ඒ පරිච්ඡේදය ඉවරයි.

Sunday, September 27, 2009

ජූම්ලා සම්බන්ධ ප්‍රශ්නයක්.


මම මේක සිංහල යුනිකොඩ් ගෲප් එකෙයි, සිංහල බ්ලොග්කරුවන්ගේ ගෲප් එකෙයි දැම්ම, නමුත් තාම පිළිතුරක් නම් ලැබුනෙ නෑ. මම ජූම්ලා වලින් සයිට් එකක් හැදුව (http://madhawa.lkwebhost.com). හැදුවෙ හොස්ටිං එකත් එක්ක එන auto installer එක පාවිච්චි කරල. 
මට මේකෙ පොඩි ප්‍රශ්නයක් තියෙනව, සිංහල වලින් මොකුත් දාන්න බෑ. සිංහලෙන් මොනව හරි ටයිප් කරල ඒක සේව් කරපු ගමන් සිංහල අකුරු ටික ????? ???? ටිකකට හැරෙනව.  
මේකෙ තීම් එකත් මමම හදපු එකක්. ඒකට ඉස්කෝලපොත ෆොන්ට් එකත් දැම්ම, css එක වෙනස් කරල, ඒත් හරිගියේ නෑ. හරිම ප්‍රශ්නයක්. 
මම එතනම හදපු වර්ඩ්ප්‍රෙස් බ්ලොග් එකටත් මේ ප්‍රශ්නෙම ආව (ඒකත් කළේ auto installer එකෙන්: http://madhawa.lkwebhost.com/blog/), නමුත් ඒක ඉවත් කරල. මමම හොස්ට් කළාම එකේ අවුල හරි ගියා. මට මේකට විසඳුමක් තාම හොයාගන්න බැරි උනා. තාම හොයනව.

කොටස් වෙළඳපළ ආයෝජනයේ වාසි


මීට ඉස්සෙල්ල මේ ගැන කෙටියෙන් කියල තියෙනවනෙ. දැන් ටිකක් සවිස්තරව කියන්න හිතුව. කොටස් වෙළඳපළින් ප්‍රතිලාභ ලැබිය හැකි ආකාර දෙකක් ප්‍රධාන වශයෙන් තිබෙනව. 1. ලාභාංශ (Dividends) 
2. ප්‍රාග්ධන ලාභ (Capital gains)

මොනවද මේ ලාභාංශ කියන්නෙ?  
ලාභාංශ කියන්නෙ යම් සමාගමක් ලබන ලාභයෙන් කොටසක් එම සමාගමේ කොටස් හිමිකරුවන් අතර බෙදා දීම. වෙනත් වචන වලින් කිව්වොත් ලාභාංශයක් කියන්නෙ සමාගම ලැබූ ලාභයේ කොටස් හිමියාගේ කොටස.
එම වසර තුළ ලැබූ ලාභය අනුව, සමාගමේ අධ්‍යක්ෂක මණ්ඩලය, එම වසරට අදාළ ලාභාංශ අනුපාතය තීරණය කරනව. එය මූල්‍ය (Cash dividends) හෝ කොටස් (Share dividends) වියහැකියි. හැබැයි වැදගත් දෙයක්, සමාගම, එහි කොටස් හිමියන්ට ලාභාංශ ලබා දීම අනිවාර්ය නැහැ, සහ ඔවුන් එයට බැඳී නැහැ. ඔවුන්ට තීරණය කළ හැකියි, ලාභයන් කොටස් හිමියන් අතරේ බෙදාහරිනවද නැතිනම් යළි එය සමාගම සඳහාම යොදවනවද කියල. ලාභාංශ තමයි, තමුන්ගේ, එම සමාගම පිළිබඳ අයිතියට බලපෑමක් නොවී, ලාභ ලැබිය හැකි එකම ආකාරය.

XD - Date (Ex - Dividend Date)
මේක වැදගත්. තමුන් යම් සමාගමක ලාභාංශ ගන්න බලාපොරොත්තු වෙනවා නම්, එම සමාගම විසින් ප්‍රකාශයට පත් කරන මෙම දිනයට පෙර, එම සමාගමේ කොටස් අයිතිය ලාබාගෙන, එම දිනයේදීත් එම අයිතිය පවත්වාගත යුතුයි. මෙම දිනයේදී ඔබ එම සමාගමේ කොටස් හිමියෙක් නම් මුලින් සමාගම විසින් ප්‍රකාශයට පත් කළ ලාභංශ සඳහා ඔබ සුදුස්සෙකු වෙනවා. සමාගම පකාශයට පත් කර ඇති ඊළඟ දිනයේදී ඔබට අදාළ ලාභාංශ එම සමාගම විසින් ඔබේ නිවසටම චෙක්පතක් මගින් එවනවා.

උදා: 
ඔබ X‍YZ සමාගමේ කොටස් 1000ක් රු. 12 බැගින් මිලදී ගන්නව. 
එම සමාගම තීරණය කරනව, එම සමාගමේ කොටස් හිමියන්ට එක කොටසකට ශත 50 බැගින් ලාභාංශ ලබා දීමට. ඔවුන් XD date එක වශයෙන් 2009.04.05 තීරණය කරනව. ලාභාංශ ගෙවන දිනය 2009.04.11 ලෙසත් ප්‍රසිද්ධ කරනවා. 
ඔබ එම දිනය වන විට එම කොටස් වල හිමිකාරීත්වය පවත්වා ගතහොත් ඔබට 2009.04.11 දිනයේදී 0.50 * 1000 = රු.500 ක ලාභාංශයක් හිමි වෙනවා.

එතකොට ප්‍රාග්ධන ලාභ කියන්නෙ?
තමා සතු වත්කමක වටිනාකම කාලය සමඟ වැඩි වන විට එයින් ලැබෙන ලාභය ප්‍රාග්ධන ලාභයක් ලෙස හැඳින්වෙනවා. හබැයි මෙම ලාභය ලබන්න නම් එම වත්කම විකිණිය යුතුයි. මෙතනදි මේක වෙන්නෙ ,මෙහෙමයි. ඔබ යම් සමාගමක කොටස් ගන්නව යම් මිලකට. ටික කාලයක් යනවිට එහි මිල ඉහළ යනව. එතකොට ඔබට එතැන, ප්‍රාග්ධන ලාභයක් තිබෙනව. හැබැයි එම ලාභය ලබන්න ඔබ ඔබ සතු කොටස් දැන් වෙළඳපළ මිලට විකිණිය යුතු වෙනවා. එවිට ඔබේ ප්‍රාග්ධන ප්‍රමාණය ඉහළ යනවා. උදා: ඉස්සෙල්ල එකෙන්ම ගමුකෝ. කොටස් 1000ක් ගත්තනෙ රු.12ට. ඔන්න එම සමාගමේ කොටස් මිල ඉහල යනව 13.25ට. ඔබට දැන් එම කොටස් 1000 වික්කොත් ප්‍රාග්ධන ලාභයක් ගන්න පුළුවන්. කීයක්ද? 1000 * (13.25 - 12.00) = රු. 1250 තේරුනා නේද? තව ටිකක් නගිනකම් තියා ඉන්නත් පුළුවන්, නැත්තම් දැන්මම විකුණල ඒ 1250 ගන්නත් පුළුවන්.

ඉහත ක්‍රමය තමයි, මෙයින් ඉපයීම් කරන්න පුළුවන් ඉක්මන්ම හා ලේසිම ක්‍රමය.

දැන් කියන්නම් මෙතන තියෙන වැදගත්ම දේ. මේ ක්‍රමයෙන් ලාභය වගේම පාඩුවක් වෙන්නත් ඉඩ තියෙනව. හදිස්සියෙ එම කොටසක මිල පහළ ගියොත් මොකද වෙන්නෙ? ඔබට පාඩුවක් වෙනව. බය වෙන්න එපා, එහෙම වෙන්නෙ ඔබ ඒ කොටස් ටික දැන් තිබෙන මිලට වික්කොත්නෙ, අවස්ථානුකූලව එම පාඩුව විඳගනිමින් ඒවා විකුණනවද, නැත්තම් ආපහු වැඩි වනතෙක් තබා ගන්නවද කියල තීරණය කරන්න ඔබට පුළුවන්.

මම තව දෙයක් කිව්ව මතකයි නේද? 
ප්‍රාග්ධන ලාභ මගින් මේ ලැබෙන ආදායම සම්පූර්ණයෙන් රජයේ ආදායම් බදු වලින් තොරයි. ඔබ මෙම ලබා ගන්නා ආදායමට කිසිම විදිහකින් ආදායම් බදු ගෙවිය යුතු නෑ.

මේ ප්‍රධාන වාසි වලට අමතරව කොටස් හිමියන්ට තවත් අමතර වාසි තිබෙනව. ඒව ඊළඟ ලිපියෙන් කතා කරමු.

කොටස් වෙළඳපළ සම්බන්ධ මුල් ලිපි කියවන්න.

Friday, September 25, 2009

අද දවස නම් හරිම කාර්යබහුල දවසක්.



කිව්ව වගේම අද නම් හරිම කාර්යබහුලයි. උදේ එක ලෙක්චර් එකකට ගියා. ඊළඟ ලෙක්චර් එකට යන්න ලෑස්ති වෙනකොට සන්ජය (අර මම කිව්වෙ මාත් එක්ක JIY වැඩ වලට එකතු වෙලා ඉන්න යාළුව.) ඇවිල්ල කිව්ව අන්න ,මීගොඩ සර් කතා කළා, දැන් යන්න ඕනෙ එයාගෙ ඔෆිස් එකට JIY එකෙ වැඩ ටිකක තොරතුරු ටික ගන්න කියල. ඉතින් මොකද කරන්නෙ. සඳුද තියෙන ප්‍රැක්ටිකල් එකේ ලැබ් ශීට් ටික බෙදන එක යාළුවෙක්ට පවරල 10 - 12 ලෙක්චර් එක කට් කරල (මේ සෙමෙස්ටරයෙ පළවෙනි ලෙක්චර් කට් කිරිල්ල.) ගියා කොල්ලුපිටියට (එහෙ තමයි මීගොඩ සර්ගෙ ඔෆිස් එක තියෙන්නෙ, එයා විදුලි බල මණ්ඩලයේ කොල්ලුපිටිය ප්‍රදේශයේ ජ්‍යේෂ්ට ඉංජිනේරුවනෙ.). ඒ තොරතුරු අරන් ආපහු කැම්පස් එනකොට 1.15 යි. සන්ජයට ප්‍රැක්ටිකල් එකට යන්නත් පරක්කු උනා. ඊට පස්සෙ තමා යුද්දෙ පටන් ගත්තෙ. අපේ ඩිපාට්මන්ට් එකට ලබන සතියෙ සඳුද, අඟහරුවාද එනව IESL එකෙන්, පරික්ෂාවකට. ඒකට මේ සතියෙ අපේ කස්ටිය ලෑස්ති වෙනව. ඉතින් ඒ සම්බන්ධ වැඩ වලට අපේ ඩිපාර්මන්ට් එකේ එක එක වැඩ. හැමෝම ඒකට ලෑස්ති වෙන්න ඕනෙ. ළමයින් එක්ක එයාලගෙ සාකච්ඡාවක් තියෙනව, ඒකෙදි මොකද කරන්න ඕනෙ කියල ඊයෙ සර්ල කිව්ව. 
ඊට පස්සෙ එයාල අපේ ලැබ්ස් වල රවුමක් යනවලු, ඒ නිසා ප්‍රක්ටිකල්ස් තුනක් දාල තියෙනව සඳුදට. (සඳුද කොහොමත් ප්‍රැක්ටිකල් තියෙන දවසක්) ඒ ප්‍රැක්ටිකල් කරන ළමයි කවුද කියල තීරණය කරන්න හුඟ වෙලාවක් ගියා, මොකද කිව්වොත් මේ පාර විෂයන් තෝරා ගැනීම් කරන්න පුළුවන් නිසා, ළමයි එක එක විෂයන්නෙ තෝරගෙන තියෙන්නෙ, ඒ නිසා කාලසටහන හදන එක නම් පට්ටම ගේමක්, සර් ළමයින්ටත් අඬ ගහල ඒක යන්තම් හදා ගත්ත. එතන තවත් ප්‍රශ්නයක් තිබ්බෙ, ඊයෙත් සමහරු තමුන් කරන විෂයන් වලට ලියාපදිංචි වීම් වෙනස් කරල නිසා කාලසටහනේ වෙනස්කම් කරන්න වෙච්චි එක. ඒකත් ඉවර කරගත්ත යන්තම්. 
ඒ අස්සෙම අපේ වසරෙ ළමයින් හුඟක් තාම මේ අධ්‍යයන වර්ෂයට ලියාපදිංචි වෙලා නෑ, ඒක කරන්න ළමයින්ගෙ record books ටිකයි, අදාළ ෆෝම්ස් ටිකයි එකතු කරගත්ත, ඔක්කොම එකතු නොවුනු නිසා ඒකත් කරන්න වෙන්නෙ සඳුදම තමා.
තව අපේ මැඩම් කෙනෙක් කිව්ව අපේ බැච් එකේ ළමයින්ගෙ උසස් පෙළ ප්‍රතිඵල ටික එකතු කරල දෙන්න කියල. ඒකත් යන්තම් කරල දුන්න (ඒත් ඔක්කෝම දෙන්න බැරි උනා, මොකද ඒ වෙනකොටත් සමහරු ගෙවල් බලා ගිහින්). ඒ අතරෙම අපේ අවසන් වසරේ කරන ව්‍යාපෘතිය ගැන අපේ උපදේශක විදිහට ඉන්න අදිකාරි සර් එක්ක කත කරන්න අදට දාගත්තනෙ ඊයෙ. ඒකට යන්නත් උනා, මගෙ අනිත් සගයා ගෙදර ගියා. මම් තනියම ගිහින් සර් එක්ක ඒකත් කතා කරගත්ත. කොහොමෙන් කොහොම හරි ඔය වැඩ ටික ඉවර වෙනකොට 3ත් පහු වෙලා. මම දවල්ට කාල නෑ ඒ වෙනකොටත්. ඉතින් කැන්ටිමට ගිහින් සැන්ඩ්විචස් 2ක් කාල, කිරි බෝතලයක් ගැහුව. ඒකට නිකං මොකද්ද උනා වගේ, ලේසි නෑ 500ml ක් නෙ. ඒ අස්සෙ තව අවුලක්. මමත් එක්ක මගෙ යාළුවෙක් ගිහින් ලැප්ටොප් එකක් ගත්තනෙ. ඒකට යන්තම් ඊයෙ XP දැම්ම, නමුත් ඒකට හරියන drivers නෑ, උන් දීල තියෙන්නෙත් Vista Drivers. ඉතින් මොකද කරන්නෙ. ලැප නෙට් කනෙක්ට් කරල drivers හෙව්ව, කොහෙද එකක්වත් නෑ. යාළුවෙක් තව විසඳුමක් දුන්න, Windows 7 දැමීම. ඉතින් මම ඒ වැඩේ තව යාළුවෙක්ට සෙට් කරල දීල මම ගෙදර එන්න ආව. ඒ 4.30ට. යන්තම් ගෙදරට අදිය තිබ්බම තමා හිතට සැන සිල්ලක් ලැබුනෙ. ඔයාල බලයි මූට මොකද මෙච්චර වැඩ කියල, ඇයි ළමයිනේ මමනෙ අපේ ඩිපාර්ට්මන්ට් එකේ අපේ ගෲප් එකේ රෙපා. :( (Level 4 - Group Representative)

Tuesday, September 22, 2009

කොළඹ කොටස් වෙළඳපළ සමඟ කෙලින්ම සම්බන්ධ වෙන්න CDAX පාවිච්චි කරන්න




CDAX කියන්නෙ මොකක්ද කියල කට්ටිය දැන් දන්නවනෙ? ආපහු කියමුකො, Colombo Direct Access Xchange (CDAX) කියන්නෙ පරිගණක මෘදුකාංගයක්. එය හරහා ඔබට පුළුවන් කොළඹ කොටස් වෙළඳපළේ ද්විතීය වෙළඳපළ සමඟ කෙලින්ම සම්බන්ධ වෙන්න තැරැව්කාර සමාගමේ කිසිවෙකුගේ සහයක් රහිතව.





ඊටපස්සෙ? 
ඊටපස්සෙ ඉතින් මොනවද, ඔයා කොටස් වෙළඳපළ ඇතුළෙ ඉන්නව වගේ තමා. වෙන හැම trade එකක්ම ඔයාට, ඒකෙන් ඒ වෙලේම පෙන්නනව. (real time trading)

ඉතින් මට මොකෝ. 
මොකද, ඔබ මිලදී ගත්තු කොටස් වල මිල ඉහල ගියොත්, ඔබට කැමති නම් එවෙලෙම ඒ කොටස් විකිණීමේ හැකියාව ඔබට තිබෙනව. ඔබට ගැළපෙන සමාගමක / වාසියක් ගන්න පුළුවන් සමාගමක කොටස් වල මිල පහළ ගියොත් , එවෙලෙම ඔබට එම සමාගමේ කොටස් මිලට ගන්න මේ මෘදුකාංගය හරහා පුළුවන්. විකුණන්න හෝ මිලට ගන්න අවශ්‍ය කොටස් මිලක් සළකුණු කරල පෝලිම් ගස්සල තියන්නත් පුළුවන්. (Queue) ඕනෙ නම් ඉදිරි දවසකදි ඒක වැටෙන්න. එක එක කොටස් සම්බන්ධ අතීත තොරතුරු මෙමගින් ලබා ගන්න පුළුවන්.  
උදා: කොටස් වල මිල උච්ඡාවචනය වෙලා තියෙන්නෙ කොහොමද, කොපමණ කොටස් විකිණිලා තියෙනවද වැනි දේවල්.

මේවට අමතරව තව පහසුකම් තිබෙනව මෙම මෘදුකාංගය තුළ. ඔබට මෙම පහසුකම ගන්න දැනට ක්‍රම දෙකක් තිබෙනව.  
1. මෘදුකාංගය පරිගණකයට ස්ථාපනය කර ගැනීමෙන් (CDAX Pro) 
2. ඔන්ලයින් CDAX අතුරු මුහුණත මගින් (CDAX Net) 
තුන්වන ක්‍රමය මග එනව, ඔබේ ජංගම දුරකතනයට CDAX Mobile ස්ථාපනය කර ගැනීම මගින්.

ඒක දාගත්තට පස්සෙ අන්තර්ජාල පහසුකම තිබෙනව නම් ඔබ කොටස් වෙළඳපළ තුළට පිවිසෙන්නට සූදානම්. ඔබේම පරිශීලක නමක් හා ඔබේම මුරපදයක් භාවිතා කරල ඔබට පුළුවන් ඔබේ ගිණුමට හා වෙළඳපළ තුළට ඇතුළු වෙන්න. (මෙම විස්තර ඔබගේ තැරැව්කාර සමාගමෙන් ලබා දෙනව. ඔබට පසුව පුළුවන් ඔබේ මුරපදය වෙනස් කර ගන්න.)

CDAX වෙබ් අඩවියට පිවිසෙන්න මෙතන කොටන්න.

මතකයිනෙ මෙම පහසුකම දැනට දෙන්නෙ තැරැව්කාර සමාගම් 7ක් පමණයි. ඒ කවුද කියල දැනගන්න 2 වන ලිපිය කියවන්න. ඒ සඳහා මෙතන කොටන්න.

කොටස් වෙළඳපළ පිළිබඳව මූලික අදහසක් නැත්තම් පරණ ලිපි කියවන්න.

Sunday, September 20, 2009

මාත් ගියා අන්තර්ජාතික පොත් ප්‍රදර්ශනය බලන්න.



BMICH හිදී 11 වන වරට මෙවරත් අන්තර්ජාතික පොත් ප්‍රදර්ශනය දැන් පැවැත්වෙනවා. ඊයෙ තමයි ආරම්භ උනේ, 27 වෙනිදා වෙනකම් මේක පැවැත්වෙනව.


ඔන්න ඉතින් මමත් ගියාලු අද ඒක බලන්න. පරණ යාළුවො ටිකකුත් සෙට් කරගෙන තමයි ගියේ. පරණ යාළුවො කිව්වට එකෙක්වත් පරණ නෑ, මම, මගෙ නංගි, අපේ අක්ක, උදිත, නිසුපා, දිමුතු සහ මනෝරි අක්ක. තව අපේ මිතුරියකට කතා කළා, අවාසනාවකට වගේ එයාට මේ දවස් වල විභාගයක්, දවස පරක්කු කළොත් අපේ අක්කගෙන් බැනුම්, එයාට එන්න වෙන්නෙ නෑ කියල. අර යාළුව නම් එයාගෙ කැම්පස් යාළුවො එක්ක යනව කිව්ව.

කොහොම හරි උදේ 9 වෙනකොට අපි BMICH එකේ. රෑ වැටුනු වලේ දවලුත් වැටෙමින්, ගිය අවුරුද්දෙ වගේම මේ අවුරුද්දෙත් ටිකට් ගත්ත. (විශ්ව විද්‍යාල සිසුන්ට ඇතුළුවීම නොමිලේ.) කමක් නෑ, ඒ සල්ලි ශිෂ්‍යත්ව අරමුදලකටනෙ යන්නෙ. හවස 5 වෙනකම් හිටිය. මගෙ නංගි, අක්ක, නිසුපාට නම් හවස් වෙනකොට එපා වෙලා හිටියෙ. 

කොහොමහරි මහලොකු මුදලක් අරන් ගියෙ නෑ, මේ දවස් වල ආර්ථික අවපාතයක්නෙ. පොත් කිහිපයක් ගත්ත. 
ලියොන් ගාර්ෆීල්ඩ් ගේ "ස්මිත්"
"තොටගමුවේ ශ්‍රී රාහුල හිමියන්ගේ අප්‍රකට ජනප්‍රවාද"
චින්ගීස් අයිත්මාතොව් ගේ "සමුගනිමි ගුල්සාරි"
අර්ල් ස්ටැන්ලි ගාර්ඩ්නර් ගේ "අවිවේකී රූමතිය"
මේරි ශෙලී ගේ "ෆ්‍රැන්කන්ස්ටයින්"
ජෑන් ක්නැපර්ට් ගේ "ගෝහා"
ඔය කිව්ව පොත් තමයි ගත්තෙ. මේ අමුතු නම් තිබ්බට ඔක්කොම සිංහල හොඳේ. 

මගේ චින්ගීස් අයිත්මාතොව් ගේ සියළු පොත් එකතු කිරීමේ ඉලක්කයට තව ඒකක එකකින් ලන් උනා සමුගනිමි ගුල්සාරි සමඟ. එය පමණමයි මට සොයා ගතහැකි වූයේ චින්ගීස් අයිත්මාතොව්ගේ පොත් වලින් මගෙ ලඟ නැති. ගුරු ගීතය එහෙම නම් වැහි වැහැල වගේ හැමතැනම තිබුනා.
ෆ්‍රැන්කන්ස්ටයින්, මමයි නංගියි දෙන්නම කියවල තිබෙනව, නමුත් නංගිට ඕනෙ කිව්ව නිසා ගත්ත.
උදිත නම් ලොකු පොත් සෙට් එකක් ගත්ත.

සමහරවිට මම අපේ කැම්පස් එකේ යාළුවො එක්කත් යන්න ඉඩ තියෙනව. බලමුකෝ. අද සෙනඟ නම් හිටිය හුඟාක්. සමහර වෙළඳ කුටි තුළ විශාල තදබදයකුත් තිබ්බ.

ගන්න ආස පොත් නම් එමටයි, මට සුවිප් එකක් ඇදුන නම් මම ලොරියකට ඇති වෙන්න පොත් ගන්නව. කොහෙද එච්චර වාසනාවක්.

Saturday, September 19, 2009

වසරේ කනිෂ්ඨ නව නිපැයුම්කරුවා තේරීමේ තරඟය


මේ වසරේත් කනිෂ්ඨ නව නිපැයුම් කරුවා තේරීමේ තරඟයේ තේරීම් කටයුතු, පසුගිය මාස 2 තුළදී සිදු උනා. මේ සඳහා ලංකාව පුරා විසිරී ඇති පාසල් වල සිටින සිසු දරු දැරියන් සහභාගි උනා. අද තමයි එහි අවසාන වටයේ තරඟ පැවැත්වුනේ. අවසන් වටය සඳහා තේරුනු සිසුන් 70 දෙනෙකුගේ නව නිපැයුම් අද විනිශ්චයට භාජනය උනා. ඒවායින් හොඳම 25 මෙහිදී තෝරා ගැනෙනවා. එම 25න් 1,2 හා 3 ස්ථාන තෝරා ගැනෙනවා. ඒවා තෝරා ගැනීමේ සාකච්ඡාව හෙට උදයේ පැවැත්වීමට නියමිතයි.
හරි, දැන් ඒ ඇති, සමහරු නම් දන්නව ඇති, නමුත් සමහරු බලනව ඇති මොකද්ද බොලේ මේ කියල. හරි හැමෝටම දැනගන්න කියන්නම්කෝ.

"වසරේ හොඳම කනිෂ්ඨ නව නිපැයුම් කරුවා" (Junior Inventor of the Year - JIY) කියන්නෙ ජාතික ඉංජිනේරු ආයතනය (Institution of Engineers Sri Lanka - IESL) මගින් වාර්ෂිකව සංවිධානය කරනු ලබන තරඟයක්. මෙය පාසල් සිසු දරුවන් ඉලක්ක කරමින් පැවැත්වෙන්නක්. ළමුන්ගේ නිර්මාණාත්මක චින්තනය දියුණු කිරීමට උනන්දු කරවන වැඩසටහනක්. ඔයාල "Techno" ප්‍රදර්ශනය නරඹල තිබෙනවනම් දැකල ඇති "Junior Inventor of the Year" කියල ප්‍රදර්ශන කුටියක්. ඒ අර කිව්ව අවසන් 25 දෙනාගේ නිපැයුම් ප්‍රදර්ශනය කිරීමට සැකසූ ප්‍රදර්ශන කුටිය.
1 වසරේ සිට 13 වසර දක්වා ඕනෑම සිසුවෙකුට සිසුවියකට මෙම තරඟය සඳහා සහභාගිවිය හැකියි. අවශ්‍ය වන්නේ නව නිපැයුමකට සරිලන නව්‍ය වූ අදහස් තිබීම පමණයි. එය භෞතික තත්වයට පත් කිරීමේ හැකියාව තිබෙනව නම් තවත් හොඳයි.

දැන් කියන්නම් විශේෂම දේ. අර කිව්ව 25 දෙනාගෙන් තෝරා ගන්න 10 දෙනෙක් ජාතික විද්‍යා පදනමෙන් (National Science Foundation - NSF) යෝජනා කරන තවත් 10 දෙනෙකුත් සමඟ කරන තවත් තරඟයකින් පසු ඉන් තෝරාගන්න දෙදෙනෙකුට ඇමරිකාවේ පැවැත්වෙන අන්තර්ජාතික නව නිපැයුම්කරුවන්ගේ තරඟයට (International Science and Engineering Fair - ISEF) ශ්‍රී ලංකාව නියෝජනය කරමින් සහභාගි වීමට අවස්ථාව ලැබෙනව. එම තරඟයට සම්පූර්ණ අනුග්‍රහය දක්වන්නෙ අපි හැමෝම දන්න Intel ආයතනය.

අර මුලින් කිව්ව 25 දෙනාගේ ඉතිරි අයට, වටිනා සහතිකපත් වගේම මුදල් ත්‍යාගත් හිමි වෙනවා. දැන් කට්ටිය බලයි, මම එතන මොන මඟුලක් කළාද කියල. මම ඒ සමඟ පසුගිය අයුරුදු 2ක් සහභාගි උනා. එහි සංවිධාන කටයුතු වලට හා විනිශ්චයන් සඳහා සහය වීම තමයි මම කරන්නේ. මා සමඟ අපේ විශ්ව විද්‍යාලයේ තවත් මගේ මිතුරෙක් (සන්ජය විපුල) මේ සඳහා සහය වෙනවා.

ඉතින් අද මොකද උනේ කියල ටිකක් කියන්නම්කෝ. අද උදෙන්ම මම එතනට ගියා. (IESL එකට, එතන තමා විනිශ්චය කටයුතු කෙරුනෙ.) අර කිව්ව අන්තිම 70 දෙනා එම ස්ථානයට පැමිණිලා හිටියා. (දෙතුන් දෙනෙක් නම් ඇවිල්ල හිටියෙ නෑ, සමහරු පරක්කු වෙලත් ආව.) 
උදෙන්ම ළමුන් සඳහා දේශන කිහිපයක්, පසුගිය වසරේ ලංකාව නියෝජනය කරමින් ඇමරිකාවේ පැවතුනු අන්තර්ජාතික තරඟයට සහභාගිව අදාළ ක්ෂේත්‍රයෙන් (Electrical and Mechanical Engineering) තෙවන ස්ථානය දිනාගත්තු සිසුවාගෙන් (චන්දුල පද්මසිරි- කොළඹ ආනන්ද විද්‍යාලය ) ඉදිරිපත් කිරීමක්, සහ සහතික පත්‍ර හා ශිෂ්‍යත්ව බෙදා දීමක් සිදු කෙරුනා.
විශේෂ ආරාධිත අමුත්තා උනේ IESL හි සභාපති වරයා. මොරටුව විශ්ව විද්‍යාලයේ ඉංජිනේරු පීඨයේ පීඨාධිපති තුමනුත් මෙම අවස්ථාවට සහභාගි උනා. එතුමන්ගේ කතාව නම් ඉතාම හරවත් හා හැමදාම වගේ සිත්ගන්නා සුළු උනා.
ඉන්පසු තේරීම් කටයුතු සිදු උනා. හවස 6 පමණ වනතෙක් මෙම කටයුතු සිදු උනා. විටෙක සිසුන් හා විනිශ්චය මණ්ඩලයන් අතර සම්බන්ධීකරණ කටයුතු කරමිනුත් විටෙක විනිශ්චය මණ්ඩලය තුළ සිට විනිශ්චයන් සඳහා සහය වෙමිනුත් මම එම අවස්ථාවේදී ක්‍රියා කළා. මේ සඳහා මගෙ මිතුරු සන්ජය විපුල ත් සහභාගි උනා.

වැදගත් දෙයක් කියන්න ඕනෙ. මෙවර වෙනදාට වඩා ළමුන්ගේ නිර්මාණ වල අඩුපාඩු විශාල ප්‍රමාණයක් තිබුනා, ඒක බොහෝවිට මෙවර සහභාගි වූ ළමුන්ගේ නොතේරුම්කම නිසා සිදුවූවක් වෙන්න පුළුවන්. මම හිතන්නේ බොහොමයක් ළමුන් මේ "නව නිපැයුමක්" කියන වචනයේ තේරුම හරි හැටි දන්නෙ නෑ. හුඟක් අය හිතන්නෙ නව නිපැයුමක් කියන්නෙ මොකක් හරි හදන එක කියල, ඒක මේ ලෝකෙ තිබුනා හෝ නැතා. නමුත් නව නිපැයුමක් කියන්නෙ අළුත්ම නව්‍යමය අදහසකට. ඒ වගේ දෙයක් මීට පෙර , මේ ලෝකය තුළ නොතිබිය යුතු දෙයක්. ඒක හුඟාක් සරළ හෝ සංකීරණ අදහසක් වෙන්න පුළුවන්. එම අදහස නිර්මාණාත්මක ලෙස ලෝකයාට ප්‍රයෝජනවත් ලෙස කුමන හෝ ආකාරයකින් ඉදිරිපත් කරන්න හැකියාව ඇත්නම් එතනදී නව නිපැයුමක් එළි දැක්වෙනවා.
සරළම උදාහරණයක් ගමු. ඔබ පාවිච්චි කරන පැන්සල කෙළවරේ තියෙන මකනය. එහෙම දෙයක් මුලින් තිබුනෙ නෑ, නමුත් එහෙම අදහසක් ඇවිල්ල ඒක ක්‍රියාත්මක කළේ චීනයේ හිටපු පුංචි ගෑණු ළමයෙක්, නමුත් ඇය එම පුංචි අදහස නිසා මිලියන ගානක් ඉපයුවා. සංකීරණ එකක් ගමු, සාපේක්ෂතාවාදය. ඇල්බට් අයින්ස්ටයින් එම අදහස නිසා නොබෙල් ත්‍යාගයෙනුත් පිදුම් ලැබුව.
ඔබ නව නිපැයුමක් කරනකොට ඒකට පාට පාට බල්බ්, සංකීරණ පරිපථ, ලොකු ලොකු සමීකරණ ඇතුළත් විය යුතු නෑ, අවශ්‍ය වෙන්නේ නව්‍යමය අදහසක් පමණයි. මේක මේ ලිපියේ සඳහන් වුනු කනිෂ්ඨ නව නිපැයුම්කරුවන්ට විතරක් නෙමෙයි, සියළුම දෙනාට පොදුයි.

මේ ඉන්නෙ අර මම කිව්ව සිසුවා, චන්දුල පද්මසිරි.


මේ ඔහු ඇමරිකාවේදී ගත්තු ඡායාරූපයක්. එහි මැද සිටින්නේ JIY හි ප්‍රධාන සංවිධායක ජ්‍යේෂ්ඨ ඉංජිනේරු මීගොඩ මහතා. අනෙක් සිසුවා JIY 2008 හි දෙවන ස්ථානය ලබා ගත්තා.


මෙහි සිටින අනෙකුත් සිසුවියන් දෙදෙනා ජාතික විද්‍යා පදනමෙන් යෝජනා වුනු දෙදෙනෙක්.


මෙම තරඟය පැවැත්වුනේ 2009 මැයි මස, ඇමරිකාවේ නෙවාඩා ප්‍රාන්තයේදී.

ඔබත් කැමති නැද්ද මේ වගේ වෙන්න? (මෙම ප්‍රශ්නය පාසල්ල් සිසුන්ට පමණයි, නමුත් අනිත් අයටත් නව නිපැයුම් කරන්න තහනමක් නෑ හොඳේ.)

Thursday, September 17, 2009

කොටස් වෙළඳපළ සමඟ වැඩ කරන්න කොටස් තැරැව් කරුවෙක් තෝරා ගන්න.






කවුද මේ තැරැව් කරුවෙක් කියන්නෙ?
ඉස්සෙල්ලත් කිව්වනෙ, තැරැව් කරුවෙක් (Broker firm) කියන්නෙ ඔබත් කොටස් වෙළඳපළත් අතර සිදුවන ගනු දෙනු හැසිරවීම සඳහා හා ඊට අදාල අනෙකුත් ක්‍රියාකාරකම් පාලනය කරන අතරමැදියෙක්.



එයාල මොකද කරන්නෙ?
මුල ලිපියෙත් කිව්ව එයාල කරනවැඩ. ප්‍රධන වශයෙන්, CDS ගිණුම් ඇරඹීම, ගනුදෙනුකරුවන් සඳහා උපදෙස් ලබා දීම, එම ගනුදෙනු සිදු කිරීම, ඊට අදාල වෙනත් ක්‍රියාකාරකම් සිදු කිරීම තමයි ප්‍රධන වශයෙන් සිදුකරන්නෙ.
ඊට අමතරව කොටස් වෙළඳපළ පිලිබඳව සමීක්ෂණ සිදු කිරීමත් කරනව. තව වැඩ තියෙනව, ඒව එච්චර වැදගත් වෙන්නෙ නෑ අපිට.


එයාල අපිට වැඩ කරනවට එයාලට මොකද්ද වෙන ලාභය?
එයාලට ඒකෙන් ලැබෙන එකම දේ තමයි, අපි මිලට ගැනීමක් / විකිණීමක් සිදු කළහොත් එයින් ලැබෙන බ්‍රෝකර් ගාස්තුව. එය අපි කරන ගනුදෙනුවේ වටිනාකමින් 0.1% ප්‍රමාණයක්. (මේක අර ඉස්සෙල්ල කිව්ව 1.425% තුළ ඇතුළත්)


ලංකාවෙ කොටස් වෙළඳපළ හා සම්බන්ධ තැරැව්කාර සමාගම් 20ක් තිබෙනව. මේ තියෙන්නෙ ඒව. ඔබට මේවයින් ඕනෙම එකක් තොඅර ගන්න පුලුවන්. හැමෝම එක වගේ තමයි. 


Acuity Stock Brokers Pvt LTd
Level 6, Acuity House,No. 53, Dharmapala Mawatha, Colombo 3.
Phone: 2206206
Fax: 2206298/9
Email: sales@dfccstockbroker.com


Asha Phillip Securities Ltd
Level 4, ‘Millennium House’, 46/58, Navam Mw., Colombo 2.
Phone: 2429100
Fax: 2429199
Email: apsl@ashaphillip.net


Asia Securities (Pvt) Ltd
Level 21, West Tower, World Trade Centre, Colombo 1.
Phone: 2423905, 5320000
Fax: 2336018
Email: enquiry@asiacapital.lk


Bartleet Mallory Stockbrokers (Pvt) Ltd
‘Bartleet House’, 65, Braybrooke Place, Colombo 2.
Phone: 5220200
Fax: 2434985
Email: info@bartleetstock.com


Ceylinco Stockbrokers (Pvt) Ltd
Level 9, Ceylinco House, 69, Janadhipathi Mw., Colombo 1.
Phone: 4714300, 4714388-9, 0777891871, 0777896064
Fax: 2387228
Email: csblcmb@slt.lk


CT Smith Stockbrokers (Pvt) Ltd
4-14, Majestic City, 10, Station Road, Colombo 4.
Phone: 2552290-4
Fax: 2552289
Email: ctssales@sltnet.lk


DP Global Securities (Pvt) Ltd
3rd Floor, Forbes & Walkers Building, 46/58, Nawam Mawatha Colombo 02.
Phone: 4700111, 2307366
Fax: 4700112, 2307365
Email: colombo.dpglobal@dpmcfs.com


HNB Stockbrokers (Pvt) Ltd
Level 6, Acuity House,No. 53, Dharmapala Mawatha, Colombo 3.
Phone: 2206206
Fax: 2206298/9
Email: hnb@hnbstock.com


J B Securities (Pvt) Ltd
150, St. Joseph Street, Colombo 14.
Phone: 2490900, 0772490900, 0772490901
Fax: 2430070, 2446085
Email: jbs@jb.lk


John Keells Stockbrokers (Pvt) Ltd
130, Glennie Street, Colombo 2.
Phone: 2326003, 2338066-7, 2342066-7, 2446694-5, 2439047-8,
4710721-4
Fax: 2342068, 2326863
Email: jkstock@keells.com


Lanka Securities (Pvt) Ltd
228/2, Galle Road, Colombo 04.
Phone: 4706757, 2554942
Fax: 4706767
Email: lankasec@sltnet.lk


Lanka Orix Securities (Pvt) Ltd
42, Sir Mohamed Macan Markar Mw., Colombo 3.
Phone: 5335225
Fax: 5365725
Email: register@lankaorixsecurities.com


NDBS Stockbrokers (Pvt) Ltd
5th Floor, NDB Building, 40, Navam Mw., Colombo 2.
Phone: 2314170-8
Fax: 2314180
Email: mail@ndbs.lk


S C Securities (Pvt) Ltd
2nd Floor, 55, D R Wijewardene Mw., Colombo 10.
Phone: 4711000
Fax: 2394405
Email: cscres@sltnet.lk


Somerville Stockbrokers (Pvt) Ltd
137, Vauxhall Street, Colombo 2.
Phone: 2329201-5, 2332827, 2338292-3
Fax: 2338291
Email: ssb@sri.lanka.net


Trading Members (Debt and Equity)
Amana Securities Ltd.
532/4 F, Srikotha Lane, Galle Road,
Colombo 3.
Phone: 2506101-4,
Fax: 2506105


Capital Alliance Securities (PVT) LTD
Level 5, Millennium House, 46/58, Nawam Mw., Colombo 02.
Phone: 2317777
Fax. 2317788


First Capital Equities (Pvt) Ltd.
32nd Floor, East Tower,
World Trade Centre, Echelon Square, Colombo 1.
TPhone: 5884400 Fax: 5884401


SMB Securities (Pvt) Ltd
Landmark Building, 385, Galle Road, Colombo 03.
Phone: 5539593
Fax: 2301798
E-mail: smbsecurities@gmail.com


Taprobane Securities (Pvt) Ltd
10, Gothami Road, Colombo 08.
Phone: 5328100 Fax: 5328109
E-mail: janaka@tap.eureka.lk, dayan@tap.eureka.lk


ඔයාලට අන්තර්ජාලය හරහා ගනුදෙනු කිරීම් කරන්න ඕනෙනෙ නම්, මේ හැම එකක්ම හරියන්නෙ නෑ, එම පහසුකම සපයන්නෙ දැනට මෙන්න මේ සමාගම් 7 විතරයි.
ඒ කිව්වෙ CDAX මෘදුකාංගය භාවිතයෙන් කොටස් වෙළඳපළ වැඩ කරන්න කැමති නම්.

ඔබට වෙනත් ප්‍රශ්න තිබෙනව නම් කෙලින්ම කොළඹ කොටස් නිකුතුව අමතන්න පුළුවන්. මෙන්න එයාලගෙ විස්තර. ඔබට එතනට ගියොත් කොටස් වෙළඳපළ ආයෝජනය පිළිබඳ සියළු විස්තර දැන ගන්න පුළුවන්.

COLOMBO STOCK EXCHANGE

Level 4, West Block,
World Trade Centre, Echelon Square,
Colombo 1, Sri Lanka.
Phone: 94-11-2446581(Hunting)
Fax: 94-11-2445279
E-mail: info@cse.lk
Web: www.cse.lk


කොටස් වෙළඳපළ සම්බන්ධ මුල් ලිපි කියවන්න.
1. කොටස් වෙළඳපළ ආයෝජනය ගැන වචන කිහිපයක් (Investing in Colombo Stock Exchange)

Sunday, September 13, 2009

පරණ DOS මතකය අලුත් කරගන්න



ළමයි ඩොස් ගේම්ස් ගහල ඇතිනෙ. අනේ මම නම් හරිම පොඩ්ඩයි ගහල තියෙන්නෙ, මොකද මට පරිගණකයක් එක්ක හැප්පෙන්න ලැබුනෙ වින්ඩෝස් 98 කාලෙ වගේ ඉඳල. ඉතින් මට දකින්න ලැබුන ලස්සන සයිට් දෙක තුනක්, මොනවද මේ? පරණ ඩොස් ගේම්ස් නොමිලේම ගන්න පුළුවන් වෙබ් අඩවි කිහිපයක්. මීට අමතරව තව සයිට් ඇති මේ වගේ පරණ දේවල් ගන්න පුළුවන්, මම හොයල බැලුවෙ නම් නෑ, ඔයාල හොයල බලන්නකෝ.



කොටස් වෙළඳපළ ආයෝජනය ගැන වචන කිහිපයක් (Investing in Colombo Stock Exchange)


මම පොඩ්ඩක් කොටස් වෙළඳපළ ගැන ලියන්න හිතුව, වැඩේ නම් අමාරුයි. මොකද ඒකෙ තියෙන වචන වලට සිංහල වචන මට හොයන්න වෙනව, සිංහල ඉංග්‍රීසි කලවමේ ලියනකොට තියෙන අමාරුවත් දන්නවනෙ? කොළඹ කොටස් වෙළඳපළ වෙබ් අඩවියෙන් තොරතුරු අරන් තමයි ලියන්න වෙන්නෙ, ඒක පරිවර්තනයත් ලේසි නෑ.
අමාරුයි කිව්වට අත ඇරියෙම නෑ, වචන දෙක තුනක් හරි ලියන්න හිතුව. සරළම අදහසක් ලබා දෙන්න.
මුලින්ම කියන්නම්, මම මේ ක්ෂේත්‍රයට ආවෙ මේ අවුරුද්දේ මුල, ඒ කියන්නෙ මගෙ දැනුම අතිශය පොඩ්ඩයි කියන එක. නමුත් ඒ දන්න දෙයින් මට පොඩි හරි වැඩක්කරගන්න පුළුවන් සහ, මම මේ වෙනකොට කිහිප දෙනෙක්ව මේකට ඇදල අරගෙන තියෙනව. පොඩි උපදෙසක් උනත් දෙන්න බැරි කමක් නෑ.


කොටස් වෙළඳපළ, කොටිම කිව්වොත් මේක ගමේ පොළ වගේ තමා, හැමෝටම ඕනෙ තමුන් ලඟ තියෙන ඒව වැඩිම ගාණට විකුණ ගන්න, හැමෝටම ඕනෙ හැම එකක්ම අඩුවට ගන්න. එතනයි තරඟය තියෙන්නෙ.

මෙහිදී වෙන්නේ, ඔබට හැකියාව තිබෙනව මෙතන ලැයිස්තුගත ආයතන (කොම්පැනි ) වලට ඔබේ මුදල් යොදවල ඒවායේ කොටස් මිලට අරගෙන ඒ කොම්පැනි වල ක්‍රියාකාරිත්වයට සුළු ප්‍රමාණයකින් හෝ දායක වෙන්න. ඔබ ඇත්තටම එම ආයතන වල කොටස්කරුවෙක්, චූටි හරි අයිතියක් ඇති කෙනෙක් වෙනව.

ඔබ කොහොමද කොටස් මිලට ගන්නෙ?
ප්‍රධාන වශයෙන් ක්‍රම දෙකක් තියෙනව. 
1. මූලික වෙළඳපලින් මිලට ගැනීම (Primary Market)
2. තැරැව් කරුවෙකු හරහා Secondary Market එකෙන් මිලට ගැනීම.



තියෙන්න ඕනෙ මූලික අවශ්‍යතා මොනවද? 
1. CDS ගිණුමක් (Central Depository System Account) 
2. එම ගිණුම තුළ මුදල්

කොහොමද CDS ගිණුමක් හදා ගන්නෙ? 
මුලින්ම ඔබ ඔබට ගැළපෙන මූල්‍ය තැරැව් කරුවෙක් (Stock Broker) තෝරා ගත යුතුයි. එම සමාගම හරහා ඔබට CDS ගිණුමක් ඇර ගත හැකියි. කවුද මේ "තැරැව්කාර සමාගම"ක් කියන්නෙ? ඔවුන් තමයි කොටස් වෙළඳපළ හා සම්බන්ධව ඇති පුද්ගලයින්. 
ඔබට අනිවාර්යයෙන්ම තැරැව් කරුවෙක් අවශ්‍යයි ඔබ Secondary market එකේ වෙළඳාම් කරනව නම්. එම සමාගම ඔබට උපදෙස් දෙනව මොනවද ගන්න හොඳ, කොහොමද දැන් වෙළඳපළ තත්වය, පසුගිය වාර්තා, සහ තව බොහෝ දේවල් ඔබට ඔවුන්ගෙන් ලබා ගත හැකියි. එතනින් ඔබට ලැබෙනව උපදේශකයෙක් (Investment Adviser), ඔහු හෝ ඇය තමයි ඔබ සමඟ සම්බන්ධ වන්නේ.
ලංකාව තුළ තිබෙනව මෙවැනි සමාගම් 20ක්, ඔබට කැමති එකක් තෝරා ගන්න පුළුවන්. විශේෂ දෙයක් කියන්න ඕනෙ, කොටස් වෙළඳපළ සම්ඟ කෙලින්ම අපිටම ගනුදෙනු කළ හැකි මෘදුකාංගයක් තිබෙනව (CDAX). එම මෘදුකාංග පහසුකම නම් මෙම සියළු සමාගම් ලබාදෙන්නෙ නෑ, ඔබට බලාපොරොත්තුවක් තිබෙනවනම් එහෙම දෙයකට, ඊට ගැළපෙන සමාගමක් තෝරාගන්න. මෙතන තිබෙනව එම සමාගම් කිහිපය ගැන සහ අර කිව්ව මෘදුකාංගය ගැන විස්තර.
http://www.cdax.lk

CDS account එකේ වැඩේ මොකද්ද? 
ඒක හරියට බැංකු ගිණුමක් වගේ, ඔබ යොදන මුදල්, මිලට ගන්න කොටස්, සුරැකුම්පත් වැනි සියළුම දේවල් තියෙන්නෙ ඒක ඇතුළෙ.

ගිණුමක් හදා ගත්ත, ඒකට සල්ලි දැම්ම. දැන් මොකද කරන්නෙ?
මේ දෙක කළා නම් ඔබ කොටස් මිලට ගැනීමට සූදානම්. (මුදල් යෙදවිය හැක්කේ නෝට්ටු වශයෙන් හෝ චෙක්පත් ලෙස පමණයි )
දැන් කරන්න තියෙන්නෙ ඔබ කැමති සමාගම් කිහිපයක් තෝරාගෙන ඔවුන්ගේ කොටස් මිලට ගැනීම, හැබැයි කැමතී කියල එක එක සමාගම් වල කොටස් මිලට ගන්න යන්න එපා, මුලින් ඔබේ උපදේශකගෙන් අහල බලන්න. එතකොට එයා කියයි මොන මොන ඒවද මේ දවස් වල ගන්න හොඳ, මොන මොන ඒවටද පොළියක් ලැබෙන්නෙ වගේ දේවල්. ඒ සේරම හිතල බලල, එයාට කියන්න එහෙනම් මෙන්න මේක ගන්න කියල. මිලදී ගත හැකි අවම කොටස් ප්‍රමාණය සාමාන්‍යයෙන් 100යි, නමුත් 1, 2, උනත් ගන්න පුළුවන් (odd market එකේදී. හැබැයි ඒව ආපහු විකුණන්න නම් අමාරු වෙයි.

කොටස් ජාති 
විවිධාකාරයේ කොටස් තිබෙනව.
Ordinary Shares (N)
Non-Voting Ordinary Shares (X)
Preference Shares (P)
Warrants (W)
මේ ඇරුනම තව ජාති කිහිපයක් තිබෙනව.

කොහොමද කොටස් ගන්නෙ? 
මම මුලින් කිව්ව වගේ ඔබේ තැරැව් කාර සමාගම හරහා තමයි සියළු දේවල් වෙන්නෙ. ඔබ කිව්වම එයාල ඔබ වෙනුවෙන් එම කොටස් මිලයට අරන් ඔබේ CDS ගිණුමට දානව. ඔබේ CDS ගිණුමෙන් සල්ලි වියදම් කරල.

විකුණන්නෙ කොහොමද? 
ඒකත් ඉස්සෙල්ල වගේම තමයි, ඔබ ඔබේ තැරැව්කාර සමාගමට කිව්වම එයාල ඒව විකුණල ලැබෙන මුදල් ඔබේ CDS ගිණුමට බැර කරනව.

එයාල එහෙම නොකර ඉඳීද? 
එහෙම බෑ, ඒක එයාලගෙ වගකීම. අපි කියන ඕනෙම දෙයක් කරන්න එයාල බැඳිල ඉන්නව. තව දෙයක්, එයාලට කිසිම විදිහකින් අපිට අලාභ වෙන දෙයක් කරන්න බෑ, ඒක නීති විරෝධියි.

එයාල අපිට වැඩ කරනවට එයාලට මොනවද ලැබෙන්නෙ? 
අපි කරන ඕනෙම විකිණීමකදි හා මිලට ගැනීමකදි තැරැව්කාර සමාගමට, කොළඹ කොටස් නිකුතුවට, බදු සඳහා වැනි දේවල් කිහිපයක් වෙනුවෙන්, අපි කරන ගනුදෙනුවේ වටිනාකමින් 1.425% ප්‍රමාණයක් අර කිව්ව ස්ථාන වලට ලැබෙනව.

වැදගත්ම ප්‍රශ්නෙ, අපිට ගානක් අතට එන්නෙ කොහොමද? 
මුලින්ම කියන්න ඕනෙ, කොටස් වෙළඳපළ ආයෝජනය කියන්නෙ අවදානම් සහගත වෙළඳාමක්, ඔයාලට ඒ අවදානම ගන්න වෙනව. මොකද එක පාරටම ඔයාල කොටස් ගත්තු සමාගමක් කඩා වැටුනොත් ඔයාලගෙ මුදල් වතුරෙ යන්න ඉඩ තියෙනව. 
බය උනාද? බය වෙන්නෙපා, එහෙම වෙන්නෙ නෑ ලේසියෙන්, නමුත් මිල උච්ඡාවචනය නිසා වැඩි මිලකට ගත්තු එකක් අඩු මිලකට විකුණල අලාභ ලබන්න නම් ඉඩ තියෙනව. මටත් පෞද්ගලිකව ඒක වෙලා තියෙනව.

හරි, ප්‍රශ්නෙට එමු. මූලිකම හා ඉක්මන්ම ක්‍රමේ තමයි ඔබ ගත්තු සමාගමේ කොටස් වල මිල ඉහළ ගියොත් එම මිලට ඔබේ කොටස් විකුණල ගන්න පුළුවන් ලාභය.

උදා: ඔබ X කියන සමාගමේ කොටස් 400ක් ගන්නව එකක මිල රු.10 ගානෙ, ඒකෙ මිල ඉහළ යනව රු. 12.75ට. ඔබ මොකද කරන්නෙ, ඒ ගත්තු කොටස් ටික දැන් වෙළඳපළ මිලට විකුණනව. මොකද වෙන්නෙ? ඔබ 4000ක් වියදම් කරල 5100ක් ලබා ගන්නව. ඔබේ ලාභය රු. 1100 යි.
නරක නෑ නේද???

ඊළඟ ක්‍රමේ, සමාගමෙන් කොටස් වලට දෙන පොළිය (Dividends) ලබා ගැනීම.
මෙක හැම සමාගමක්ම කරන්නෙ නෑ, එහෙම පොළියක් ලබාදීමට එම කිසිම සමාගමක් බැඳිලත් නෑ.
සමාගමේ අධිකාරිත්වය කිව්වොත් අපි අපේ කොටස් කරුවන්ට පොළියක් දෙමු කියල, එයාල එම වසරේ ගත්තු ලාභය අනුව කියනව අපි එක කොටසකට මෙන්න මෙච්චර පොළියක් දෙනව කියල. ඔබ එම සමාගමේ කොටස් අරන් තිබෙනව නම් ඔබට එම පොළිය චෙක්පතක් මගින් ගෙදරටම එනව.

උදා: අර මුලින් කිව්ව X සමාගම තීරණය කරනව 2009.09.15 දිනට එම සමාගමේ කොටස් කරුවන්ට එක කොටසකට රු. 1.50ක පොළියක් ලබා දීමට. ඔබ ලඟ තිබෙනව නේද ඔවුන්ගෙ කොටස්? විකුණන්න එපා, තියාගන්න. ඔබට එම දිනයේදී රු. 600ක් ලැබෙනව පොළිය වශයෙන්.

තව ක්‍රම කිහිපයක් තිබෙනව, ඒත් මේ දෙක තමා වැදගත්ම, ඒනිසා මේ දෙක ගැන දැනගත්තම හොඳටම ඇති.

කොටස් වෙළඳපළ ගැන චුට්ටක් 
හරි, දැන් බලමු මේ කොටස් වෙළඳපළ ගැන. මේක ඇරල තියෙන්නෙ සතියෙ දවස් වල පමණයි, ඒකත් උදේ 9.30 ඉඳල හවස 2.30 වෙනකම් විතරයි, කරන ඕනෙම දෙයක් ඒ වෙලාව ඇතුළත තමයි. ඒකත් එයාලගෙ වෙන වැඩ සඳහා මේ කිව්ව වෙලාවන් තුළ වහන්න ඉඩ තියෙනව. සියළුම රජයේ, වෙළඳ, බැංකු නිවාඩු දින වල මේක වහල. (නමුත් තැරැව්කාර සමාගම් හවස 4.30 දක්වා වැඩ කරනව )  

කොටස් වෙළඳපළ තුළ තිබෙනව ප්‍රධාන මිල දර්ශක දෙකක්. 
සියළු කොටස් මිල දර්ශකය (All Share Price Index | ASI) 
මුළු කොටස් වෙළඳපළ තත්වය ගැන තමා මෙයා කියන්නෙ. 
මිලන්කා මිල දර්ශකය (Milanka Price Index | MPI) 
කොටස් වෙළඳපළ පසුගිය කාර්තු 4 තුළ ඉහළම ක්‍රියාකාරිත්වයක් දැක්වූ සමාගම් 25හේ තත්වය තමා මේකෙන් කියන්නෙ.  

කොටස් වෙළඳපළ තුළ තිබෙනව පුවරු 
Main Board
බොහොමයක් විශාල කොම්පැනි තියෙන්නෙ මෙම පුවරුවෙ තමයි.
Diri Sawi Board
මධ්‍යම හා කුඩා සමාගම් තිබෙන්නෙ මෙම පුවරුවෙ.
Default Board
චූටි චූටි වැරදි කරපු කට්ටියව මේකට දානව. (වාර්ශික වාර්තාව නොදුන්න කට්ටිය එහෙම )

මේ කිව්ව ඒවයින් පොඩි දැනුමක් ලැබෙන්න ඇති කියල හිතනව. ප්‍රශ්න තියෙනවනම් අහන්න, දන්න තරමින් උත්තර දෙන්නම්.  

තව වැදගත් දෙයක්, මේක අන්තිමට කියන එක හරිද මන්ද. මම මේ ලිපිය ඇතුළෙ ලොකු ලොකු ඉලක්කම් දාල කිව්වට හැම වෙලේම එහෙම ලොකු ලොකු ලාභ ලැබෙන්නෙ නෑ, ඔබට ටිකක් ලොකු මුදලක් ආයෝජනය කරන්න පුළුවන් නම් එහෙම ගත්තැකි. පොඩි මුදලකින් ටිකක් ඉස්සරහට යන්න අමාරුයි, අධෛර්යයට පත් වෙන්නෙ එපා, බැරි නෑ. මම රු. 100, 200 වගේ ලාභ තියාගෙනත් විකුණල තියෙනව, මට රු. 30, 50 චෙක්පතුත් ගෙදරට ඇවිල්ල තියෙනව.  
මමත් පටන් ගත්තෙ පොඩි ගානකින්, නමුත් මම යොදපු මුදල මම මේ පහුගිය මාස 8ට 150% දක්වා වැඩි කරගෙන තියෙනව. (ඊට වඩා වැඩි කරගන්නව, training කාලේ මේක එක්ක ඉන්න උනේ නෑනේ. 
ඔබට මේකට කාලය ගත කරන්න පුළුවන් නම්, ටිකක් ලොකු මුදලක් ආයෝජනය කරන්න පුළුවන් නම්, මේක කිසිම ප්‍රශ්නයක් නැතුව ඔබේ ජීවනාලිය කරගන්න පුළුවන්.

ජය වේවා!!! 

මේක කියවල තව කිහිප දෙනෙක් හරි කොටස් වෙළඳපළ ආයෝජනයට හැරුනොත් සතුටුයි. වෙන රට වලට සාපේක්ෂව ලංකාවෙ මේ පැත්තට හැරිල ඉන්නෙ බොහොම අඩු ප්‍රතිශතයක්, ඒක වැඩි කරන්න පුළුවන් නම්, ඒකත් ලංකාවෙ ආර්ථිකයට හුඟාක් හොඳයි. (කොළඹ කොටස් නිකුතුව හා සම්බන්ධ වී ඇති පිරිස 200,000 ආසන්න අගයක් ගන්නෙ, ඒ අගය කිසිම විදිහකින් ප්‍රමාණවත් නෑ.)
එක අතකින් මේක හොඳ රැකියා අවස්ථාවක්. ගෙදරට වෙලා පරිගණකය දිහා බලා ඉන්න, යතුරු කිහිපයක් ඔබන්න, කෝල් කිහිපයක් ගන්න විතරයි තියෙන්නෙ.  

තව වැදගත් දෙයක්, ඔබ මෙයින් ලබා ගන්නා සියලුම ආදායම, ආදායම් බදු වලින් තොරයි, ඒ කිව්වෙ ඔබට මේ ලබා ගන්නා මුදල් සඳහා ආදායම් බදු ගෙවන්න ඕනෙ නෑ. 


කොටස් වෙළඳපළ සම්බන්ධ ඉදිරි ලිපි කියවන්න.

Friday, September 11, 2009

මම ලියපු දිගම කමෙන්ට් එක


අප්පේ මේක ලියන්න ගිහින් මට එපා උනා. මගෙ යාලුවෙක්ගෙ බ්ලොග් එකක මිනිහ පෝස්ට් එකක් දාල, මට චැට් එකේදි කිව්ව උඹේ අදහසුත් ලියපන් කියල කමෙන්ට් එකක් විදිහට. ඉතින් මම ලිවුව. 
මගෙත් ආසම ක්ෂේත්‍රයක් සම්බන්ධයෙන් තමා ඒ ලිපිය තිබ්බෙ, නිනිති තාක්ෂණය (nano technology). ඉතින් පොඩ්ඩක් වට පිටත් හොයල බලල පොඩි කමෙන්ට් එකක් ලිව්ව. 
මොන පොඩිද? 
මම එච්චර දිගට ලිපි ලියල තියෙන්නෙත් හරි අඩුවෙන්. ලියල ඉවර කරල පෝස්ට් කරල, ඒකෙ දිග දැක්කම හිතුන ඒක ලිපියක් විදිහටම ලිව්ව නම් හොඳයි කියල. 
පොඩ්ඩක් ගිහිල්ලම බලන්නකො.
ඔයාලගෙත් අදහස් දෙන්න ඒ ලිපියට.

Thursday, September 10, 2009

අද දවස හොඳයි


අද දවස නම් සතුටු දායක දවසක්, මේක ඊයෙ වෙන්න ඔනෙ උනේ. මාස කිහිපයකට පස්සෙ මගෙ කොටස් වල මිල ඉහළ ගිහින්. මාස ගානක් තිස්සෙ අලාභ පැත්තෙ තිබ්බ මගෙ කොටස් වල අගය අද ලාභ පැත්තට ඇවිල්ල. මේක වෙන්න ඇත්තෙ ඊයෙ, මොකද ඊයෙ කොටස් වෙළඳපල සැලකිය යුතු අගයකින් ඉහළ ගියා, ඒත් මට බලන්න බැරි උනා. අද ගෙදර ඇවිල්ල යන්තම් බැලුවමයි දැක්කෙ. 
ඊයෙ තවත් විශේෂ දෙයක් උනා, ඒක ඉස්සරහට කියන්නම්, දැම්ම නෙමේ. 
කොහොම හරි මට ඊයෙ වාසනාවන්ත දවසක් වගෙයි. හරිම සතුටුයි....... 

Wednesday, September 9, 2009

නියම ගේම් එකක් - ගූගල් මැප්ස් එක්ක කරපු වැඩක්



මේ ගේම් එක රිලීස් කරන්නෙ අද (දැනටමත් කරලද දන්නෙ නෑ). ඔයාල සමහරෙක් දන්නව ඇතිනෙ "Travian" ගැන, ඒක මුළු ලෝකෙ පුරාම ඉන්න හැමෝම එකිනෙකාට විරුද්ධව සටන් කරන Stratergy ගේම් එකක්. මේකත් එහෙමම එකක් තමයි. නමුත් මේකෙ විශේෂත්වය තියෙන්නෙ මේ ගේම් එක පවතින්නෙ ඇත්තම ලෝකෙ තියෙන තැන් අනුව. ඒක කරල තියෙන්නෙ ගූගල් මැප්ස් වල සහයෙන්.
ගේම් එකේ නම "Monopoly City Streets". "Hasbro" කියන කට්ටිය තමයි මේක හදල තියෙන්නෙ. මේකෙත් කරන්න තියෙන්නෙ ලෝකෙ තියෙන ලොකුම අධිරාජ්‍යයට සටන් කරන්න. පාරක් අල්ලගත්ත, ගෙවල් හැදුව, වෙනත් ගොඩනැඟිලි හැදුව, බදු එකතු කළා, පෝසත් වෙලා ලෝකෙම අල්ල ගන්න තියෙන්නෙ.

Monopoly City Streets

මෙන්න මෙහෙමයි එයාලගෙ සයිට් එකේ තියෙන්නෙ.


"A live worldwide game of MONOPOLY using Google Maps as the game board. The goal is simple. Play to beat your friends and the world to become the richest property magnate in existence.
Own any street in the world. Build humble houses, crazy castles and stupendous skyscrapers to collect rent. Use MONOPOLY Chance Cards to sabotage your mates by building Hazards on their streets."


පටන් ගන්නකොට ඔයාලට ඩොලර් මිලියන තුනක් ලැබෙනව, ඒව වියදම් කරල වැඩ පටන් ගන්න තමයි තියෙන්නෙ.

Sunday, September 6, 2009

මුහුණු පොතේ වැඩි මිතුරන් ගණනක් ඕනෙද?

නම හොඳ උනාට ටිකක් සල්ලි යන වැඩක් හොඳේ.
දන්නවනෙ ඉතින්, මුහුණු පොත කියන්නෙ ඉතා හොඳ, කාර්යක්ෂම දැන්වීම් ප්‍රචාරණ මාධ්‍යයක්. තමුන්ගෙ මිතුරන් ගණන හෝ, රසික පිටුවකට ඉන්න රසිකයන් ගණන වැඩි නම් තමුන්ට ලැබෙන ප්‍රසිද්ධිය වැඩියි. නමුත් ඉතින් එහෙම මිතුරන් ගණන වැඩි කරගන්න එක නම් ලේසි නෑ.
ඒකට විසඳුමක් ඕස්ට්‍රේලියානු වෙළඳ ප්‍රචාරණ ආයතනයක් (uSocial) ලබා දීල තියෙනවලු. මොකද්ද දන්නවද, සල්ලි වලට මිතුරන්/රසිකයින් ලබා දීම0
එයාලගෙ පැකේජ කිහිපයක් තියෙනව, පටන් ගන්නෙ මිතුරන් 1000න්. වියදම ඇමරිකානු ඩොලර් 177යි. ඉවර වෙන්නෙ මිතුරන් 10,000න්, එකට යන්නෙ ඇමරිකානු ඩොලර් 1167යි.


Targetted Facebook Friends

මුහුණු පොතේ කට්ටිය මෙහෙම කියනවලු."We're just beginning an investigation now, but it's clear to us that potential customers of their service should be cautious," Facebook said in a statement."

ඔය කිව්ව කොම්පැනියෙ කට්ටිය මෙහෙම කිව්වලු අන්තිමට.
"The value of a person that is tricked, coerced or bribed into being a Facebook friend or fan is extremely limited and may actually work against whatever goals the customer is attempting to achieve."

Friday, September 4, 2009

ගූගල් තවත් භාෂා 9ක් පරිවර්තනය කරයි

ඔන්න ගූගල් භාෂා පරිවර්තකයට තවත් භාෂා 9ක් එකතු වෙලා. ඒවත් එක්ක දැන් ගූගල් භාෂා පරිවර්තකය, භාෂා 51ක් පරිවර්තනය කරනව, භාෂා යුගල 2550ක්, සියලූම යුරෝපීය භාෂා 23ත් සමඟ. 
අලුතින් එකතු වෙලා තියෙන භාෂා තමයි මෙන්න මේව.
- Afrikaans
- Belarusian
- Icelandic
- Irish
- Macedonian
- Malay
- Swahili
- Welsh
- Yiddish

තාමත් හැබැයි පරිවර්තන කාර්යයේදි පොඩි පොඩි ගැටළු තියෙනවලු, නමුත් ඒක එයාල වැඩි දියුණු කරගෙන යනවලු.
Google Translate
මෙම භාෂා පරිවර්තන හැකියාව ගූගල් හා සම්බන්ධ අනෙකුත් පහසුකම් වලටත් ඇතුළත් කරල තිබෙනව. දැනටමත් Gmail, Google Toolbar, Google Reader, and Google Docs කියන ඒව මේකට ඇතුළත්, නමුත් මේ අලුත් භාෂා 9 නම් තාම මේවට සහය දක්වන්නෙ නෑ. ඒත් ඒවත් ඉක්මනටම එතනට එයි. අනේ ඉතින් සිංහලත් මෙතනට ආව නම් අපේ කට්ටියට මෙච්චර දුක් විඳින්න ඕනෙ නෑනෙ නේද? අන්තර්ජාලය තුළ සිංහල අන්තර්ගතය වැඩි දියුණු කරන එක ගැන හිතන අතරෙ මේ ගැනත් ටිකක් හිතන්න පුළුවන් නම් අපේ දැක්ම ඉතා ඉක්මනින් සඵල කරගන්න පුළුවන් වෙයි නේද?

Thursday, September 3, 2009

Photography බ්ලොග් එකේ formatting ප්‍රශ්නයක්



ඔයාල මගෙ ඡායාරූපකරණය බ්ලොග් එක ගැන දන්නවනෙ.
http://photography-sinhalen.blogspot.com/
මට ඒකෙ ලිපි ලියනකොට එන ලොකුම ප්‍රශ්නයක් තමයි, මගෙ ලිපි වල formatting අවුල් යන එක. එඩිටර් එකේදි ලස්සනට හදල, පළ කලාම formatting අවුල් ගිහින්, බලන්නකො මගෙ අලුත්ම පෝස්ට් එක, ඒකෙ මේ අවුල ලොකුවට තියෙනව. 
http://photography-sinhalen.blogspot.com/2009/09/basic-camera-modes.html
මේක මට මගෙ පරිගණකය හරහා විතරක් එන ප්‍රශ්නයක්ද දන්නෙ නෑ. ඒත් මම හිතන්නේ නම් ඒ අවුල හැමෝටම පේනව ඇති කියල.
පොඩ්ඩක් බලල කියන්නකෝ.

ගෙදර ආවා.



කැම්පස් එකේදි බ්ලොග් එක ලියන එක නම් ටිකක් කරදරකාරියි. සිංහල නැතුව නෙමේ, ගෙදර වගේ ලියන්න ගැළපෙන පරිසරයක් නෑ. ගෙදර මගේම කොම්පියුටරයෙන් විතරයි ලියන්න හිතෙන්නෙ, ඉතින් අද ගෙදර ආපු නිසා ලිපි කිහිපයක් ලියවෙයි, අද, හෙට අනිද්ද දවස් වල. අපේ ඩිපාර්ට්මන්ට් එකේ සිංහල තිබ්බෙ පරිගණක එකක දෙකක විතරයි, ඉතින් මම මේ සතියෙ කළේ අනිත් පරිගණක ඔක්කෝටම සිංහල කිට් එක ස්ථාපනය කරපු එක තමයි. දැන් ටිකක් හරි. ඒත් මම කිව්ව වගේ එහෙදි ලියන්න නම් කම්මැලියි. 
ආ,.. තව දෙයක් කියන්න අමතක උනානෙ, ඊයෙ අපේ විශ්ව විද්‍යාලයෙ තිබ්බනෙ "සියබසින් නිමවූ යෙදුම් හා පද්ධති පිලිබඳ සම්මන්ත්‍රණය"ක් ("Symposium on Localised Systems and Applications"). ඒකටත් මම සහභාගි උනා, අපේ මේ Sinhala Blogosphere එකේ ඉන්න කට්ටිය කීප දෙනෙකුත් මුහුණට මුහුණ හමුවෙලා හඳුනා ගැනීමටත් ලැබුන. මම ඒ සම්මන්ත්‍රණය ගැන නම් කියන්න බලාපොරොත්තුවක් නෑ, මේ ලිපියෙන්. ඒ ආපු කිහිප දෙනෙක් හොඳ ලිපි කිහිපයක් ලියයි කියල මම බලාපොරොත්තු වෙනව.

එහෙනම් තවත් හොඳ ලිපි කිහිපයකින් වැඩේ පටාං ගමු.