Thursday, September 21, 2017

අලුතින් බ්ලොග් අඩවියක් අරඹමු

අපේ අදහස් ප්‍රකාශ කරන්න, අපේ නිර්මාණ එළිදක්වන්න බ්ලොග් එකක් පවත්වාගෙන යන එකදැන් හරි පහසුම මාධ්‍යයක් වෙලා. අන්තර්ජාලය හරහා තමන්ගේ අදහස් එළිදැක්වීම සඳහා තමන්ගේ හැකියාව එලිදැක්වීම සදහා හොඳම මාධ්‍ය විදිහට විදියට දැන් හුඟක් අය පාවිච්චි කරන්නේ කරන්නෙ blog. 

බ්ලොග් එකක් කියන්නේ මොකද්ද 
බ්ලොග් එකක් කියන්නේ සරලව කිව්වොත් online journal එකක්. ඉස්සර බ්ලොග් කියන එක online dairy කියලත් හැඳීින්වුණා. නමුත් දැන් බ්ලොග් හරහා දහස් ප්‍රකාශ කිරීම පමණක් නෙමෙයි වෙබ් අඩවි සෑදීමට පවා හුඟක් දෙනෙක් යොමු වෙලා ඉන්නවා. විවිධාකාරයේ themes යොදාගෙන බ්ලොග් එකක් හරහා වෙබ් වෙබ් අඩවියක් හදා ගැනීම ඉතාම පහසු දෙයක්. 

බ්ලොග් එකක් හදන්න හොද ප්ලැට්ෆෝම් එක මොකක්ද 
බ්ලොග් සෑදීම සඳහා විවිධාකාරයේ blog platform පාවිච්චි කරන්න පුළුවන් 
ප්‍රධානම ඒව තමයි Wordpress සහ blogger කියන මාධ්‍යයන් දෙක. 
ඊට අමතරව තවත් විවිධ ආකාරයේ online blog සාදාගත හැකි වෙබ් අඩවි තිබෙනවා. මේ කාලයේ ප්‍රසිද්ධ වෙමින් පවතින තවත් එකක් තමයි medium කියන වෙබ් අඩවිය 
වර්ඩ්ප්‍රෙස් ගැන කතා කළොත්, එහි blogger ආකාරයේ version එකකුත්, අපේම හොස්ට් එකක ස්ථාපනය කරගෙන සාදාගත හැකි self hosted wordpress version එකකුත් තිබෙනවා. 

ඉතින් සෑදිම පහසුම සහ වැඩිම අන්තර්ජාල ප්‍රසිද්ධියක් ලබා ගත හැකි බ්ලොගර් වෙබ් අඩවිය හරහා බ්ලොග් එකක් සාදාගන්නා ආකාරය අපි සාකච්ඡා කරමු. 

www.blogger.com හරහා බ්ලොගර් අඩවියට ඔබට පිවිසිය හැකියි.

පහළින් තිබෙන්නේ blogger වෙබ් අඩවියේ ප්‍රධාන මුහුණතයි. 
ඔබගේ gmail ගිණුම භාවිතා කර ඔබට මෙම අඩවියට පිවිසිය හැකියි. (මෙම අඩවිය භාවිතයට google ගිණුමක් අත්‍යවශ්‍යයි.) 
ඔබ gmail account එකක් තිබෙන පුද්ගලයෙක් නම් දකුණු පස ඉහළ කෙළවරේ තිබෙන sign in සබැඳිය හරහා හරහා ගොස් username password ඇතුළු කිරීමෙන් බ්ලොගර් වෙබ් අඩවියට ඇතුළුවීමට පුළුවන්. 

Blogger Home page

blogger වෙබ් අඩවියට ඇතුලු වූ පසු බ්ලොගර් ඩෑෂ්බෝර්ඩ් එක පහත ආකාරයට ඔබට දැකගත හැකියි. මින් පෙර බ්ලොග් අඩවියක් සාදා නොමැති නම් මෙය මේ පහත ආකාරයට හිස්ව පවතී. 

අලුත් බ්ලොග් අඩවියක් නිර්මාණය ආරම්භය
වම් පස ඉහළ කෙළවරේ තිබෙන new blog සබැඳිය හරහා ඔබට නව බ්ලොග් අඩවියක් සෑදීම ආරම්භ කළ හැකියි.
Blogger Dashboard

එම සබැඳිය ක්ලික් කළ විට කල විට පහත ආකාරයේ වින්ඩෝවක් විවෘත වනු ඇති. 
මෙතැනදී ඔබ ඔබගේ බ්ලොග් අඩවියට ගැලපෙන නමක් හා ඊට ගැළපෙන වෙබ් ලිපිනයක් නිර්මාණය කළ යුතු වනවා. ඊට අමතරව ඔබගේ නව බ්ලොග් අඩවියට ගැළපෙන තීම් එකක්ද තේරිය හැකියි. 
Create new blog

බ්ලොග් අඩවියේ නම් කැමති ආකාරයකට සාදාගැනීමට පුළුවන් වුවත්, වෙබ් ලිපිනය (domain name), දැනට භාවිතා කර නොමැති එකක් තෝරාගත යුතු වෙනවා. ඔබට නොමිලේ ලැබෙන්නේ blogspot.com හි සබ් ඩොමේනයක්. ඒ කියන්නෙ http://yourname.blogspot.com ආකාරයේ වෙබ් ලිපිනයක්. ඔබට www.yourname.com වැනි Top level domain ලිපිනයක් මිලට ගෙන මෙම බ්ලොග් අඩවියට සම්බන්ධ කරගැනීමත් කළ හැකියි. 

Create new blog - select a name
ඉන්පසු create blog යන බොත්තම මත ක්ලික් කිරීමෙන් ඔබට ඔබගේ නව බ්ලොග් අඩවියක් නිර්මාණය කරගත හැකියි.
බලන්න කෙතරම් පහසුද කියල.

මූලික අතුරු මුහුණත (Dashboard)
මේ පහතින් දිස් වන්නේ ඔබ අලුතෙන් නිර්මාණය කරගත් බ්ලොග් අඩවියේ dashboard එකයි. (බ්ලොග් අඩවි කිහිපයක් හැදුවොත් වම් පස ඉහළ කෙළවරට වන්නට තිබෙන බ්ලොග් අඩවි නම් ක්ලික් කිරීමෙන් ඔබගේ බ්ලොග් ලැයිස්තුව ලැබෙනවා.)
එහි වම් පස පේනුවේ විවිධාකාරයේ සබැඳිද දකුණු පස පේනුවේ ඔබගේ බ්ලොග් අඩවියට publish කර ඇති ලිපි ද පෙන්වනවා. (දැනට කිසිදු ලිපියක් නැති නිසා දකුණුපස කොටස හිස්ව තිබෙන්නෙ)

new blog dashboard

ලිපි ලිවීම 
ඉහත වම්පසට වන්නට තැඹිලි පාටින් පෙන්වන new post බොත්තම ක්ලික් කිරීම හරහා ඔබට නව ලිපියක් ලිවීම ආරම්භ කළ හැකියි. එය ක්ලික් කළ විට පහත ආකාරයේ වෙබ් පිටුවක් open වනවා. 
මෙහි work area එකෙහි ඔබට අවශ්‍ය ලිපිය සාමාන්‍ය word document එකක් නිර්මාණය කරගන්නා ආකාරයට ලිවිය හැකියි. ඉහතින් ඇති tool bar එකෙහි තිබෙන විවිධ පහසුකම් ඔබට භාවිතා කළ හැකියි . අමතක නොකර ඔබගේ බ්ලොග් ලිපියට ලිපියට ගැලපෙන මාතෘකාවක්ද යොදන්න. 
Create new post

අකුරු bold, underline, italic, color, highlight, bullet-ed list, numbered list, ප්‍රමාණය වෙනස් කිරීම වැනි පහසුකම්, රූපයක් එක් කිරීම, hyperlink එකක් එක් කිරීම වැනි දේ මෙම පහසුකම් අතර වනවා.

බ්ලොග් ලිපියට රූපයක් ඇතුළු කිරීම 
එම ටූල් භාරයේ ඇති image අයිකනය ක්ලික් කිරීම හරහා ඔබට ඔබගේ බ්ලොග් ලිපියට රූපයක් ඇතුළත් කළ හැකියි. එය ක්ලික් කළ කල විට පහත ආකාරයේ dialog box එකක් විවෘත වනවා. ඒ හරහා ඔබගේ පරිගණකය තුල ඇති හෝ ඔබගේ google drive ගිණුමේ ඇති හෝ අන්තර්ජාලය තුල ඇති images ඔබට ඔබගේ බ්ලොග් පිටුවට ඇතුලත් කර හැකියි. 
රූපය තේරීමෙන් පසුව එය අප්ලෝඩ් කිරීම හරහා එය ඔබට බ්ලොග් ලිපියට ඇතුළු කළ හැකියි. 
Add images to posts

ලිපියට ඉමේජය ඇතුළත් කළ පසු මෙසේ දිස් වනු ඇති.

Labels 
මෙතනදි මම labels ගැනත් කියන්නම්. ඔබ ලියන ලිපි විවිධ ප්‍රවර්ග (categories) යටතේ පෙළගස්වන්න ඕනෙ නම් ඒකට labels භාවිතා කළ හැකියි. ලිපියක් ලියන විට දකුණුපස පේනුවේ තිබෙන labels මත ක්ලික් කිරීමෙන් එය ඕපන් කරගන්න. ඉන්පසු අවශ්‍ය ලේබල් යොදන්න. එකක් හෝ කිහිපයක් විය හැකියි. කිහිපයක් නම්, කොමා යොදා වෙන් කරන්න.
උදා: මෙවන් ලිපියකට යොදා ගැනීමට හැකි ලේබල් වෙන්නෙ blogger, guides වගේ කියන ඒව.
Writing a blog post and adding labels

ඉන්පසු ඔබේ ලිපිය ලිවීමට බලාපොරොත්තු වෙන අන්තර්ගතය work area එකෙහි ටයිප් කිරීමෙන් ඔබට බ්ලොග් ලිපිය complete කර ගත හැකියි. (සිංහලෙන් ලියනව නම් ඔබ භාවිත කළ යුතු වෙන්නේ සිංහල යුනිකෝඩ් ක්‍රමයයි.)
අවසානයේ Publish බොත්තම ක්ලික් කර ඔබට එම බ්ලොග් ලිපිය ඔබගේ ඔබගේ බ්ලොග් අඩවියේ publish කරගත හැකියි. 
ඔබ ඔබගේ google+ ගිණුම ඔබගේ බ්ලොග් අඩවිය හා සම්බන්ධ කර ඇතිනම් ඔබ ලියූ බ්ලොග් ලිපිය Google+ හරහා ශෙයා කිරීමට ඔබට වින්ඩොවක් විවෘත වනු ඇති. මෙය හරහා ඔබට ඔබගේ අලුතෙන් publish කරන ලද ලිපිය ඔබගේ Google+ followers හට share කරන්න පුළුවන්. 
Saving and Google+ sharing

ඔබගේ බ්ලොග් අඩවියේ ඔබ ලියූ සියලුම ලිපි මේ ආකාරයෙන් දිස් වෙනු ඇති.
Blog Posts list

Blog Statistics
වම් පස පේනුවේ ඔබට පෙනෙනවා ඇති statistics යනුවෙන් සඳහන්ව ඇති සබැඳියක්. ඒ හරහා ගොස් ඔබට ඔබගේ බ්ලොග් අඩවියට පැමිණි අයගේ විස්තර බැලිය හැකියි. මොන වෙබ් අඩවි හරහාද, මොන රටවල් වලින්ද, කෙතරම් පුද්ගලයන් ප්‍රමාණයක් පැමිණියාද වැනි විස්තර ඔබට එම පිටුව හරහා බලා ගත හැකියි.
Blog Statistics
ඔබගේ බ්ලොග් අඩවියට ගිය විට එය මේ ආකාරයට දැක ගත හැකියි.

Blog Site

Edit the blog site Layout
වම් පස පේනුවේ ඇති layout තුලට ගිය විට එහි ඔබගේ බ්ලොග් අඩවියේ බ්ලොග් පිටුවේ widget සකසා ගැනීම කර ගත හැකියි. මෙහි විජට් යනුවෙන් හඳුන්වන්නේ, බ්ලොග් අඩවියේ පෙනුමට එකතු කළ හැකි කොටස්.
උදා: ඔබගේ පුද්ගලික ප්‍රොෆයිලය (Profile), බ්ලොග් අඩවියේ ලේබල් ලැයිස්තුව (Labels), රූපයක් (Image), කුමක් හෝ ලියූ text area එකක් (HTML/JavaScript), සෙවුම් පහසුකම (Blog Search). 

Blog page layout

Add widget මත ක්ලික් කළ විට මේ ආකාරයේ වින්ඩෝවක් පෙනෙනු ඇති. එම වින්ඩෝව හරහා ඔබට කැමති ආකාරයේ ගැජට්ටුවක්  ඔබගේ බ්ලොග් අඩවියට එකතු කරගැනීමට පුළුවන්. 

Adding gadgets to the blog page

Blog Settings 
මෙහි පහතින් තිබෙන්නේ ඔබගේ බ්ලොග් අඩවියේ setting පිටුවයි ඒ හරහා ඔබගේ බ්ලොග් අඩවියේ ලිපිනය වෙනස් කිරීම, නම වෙනස් කිරීම, email subscription සම්බන්ධ වෙනස්කිරීම් හා තවත් විවිධ දේ වෙනස් කිරීම් සිදු කර ගත හැකියි. 
Basic Blog settings 

Blog Theme එක වෙනස් කිරීම
ඔබගේ බ්ලොග් අඩවියේ theme එක වෙනස් කිරීමට මෙම themes පිටුව භාවිතා කිරීමට පුළුවන් blogger හි තිබෙන themes භාවිතා කිරීම හෝ අලුත්ම theme එකක් වැක් කර ගැනීම මේ පිටු හරහා සිදුකරගත හැකියි. 

Blog themes

නව බ්ලොග් ලිපිය වෙනත් social networks හරහා ශෙයා කිරීම
ඔබගේ බ්ලොග් ලිපිය open කල විට මේ පහත ආකාරයෙන් දිස් වෙයි. එහි දකුණු පස ඉහළ ඉහළ කෙළවරේ තිබෙන v හැඩති සලකුණ මත ක්ලික් කල විට සෝශල් ශෙයාරිං menu එක open වනු ඇති. 
Share Posts via Social networks

මෙහි පහත පෙනෙන්නේ එම මෙනුවයි.
මෙම මෙනුව හරහා ඔබගේ බ්ලොග් ලිපිය Facebook විට ආදී සමාජ ජාල වෙබ් අඩවි තුළ ශෙයා කළ හැකියි. 
Share Posts via Social networks
බ්ලොග් අඩවියක් මුල සිට සාදා ගන්නා ආකාරය, මූලික වෙනස් කිරීම් කරන ආකාරය, බ්ලොග් ලිපියක් ලියන ආකාරය, පළ කරන ආකාරය සහ එය සමාජ ජාල හරහා share කරන ආකාරය අපි කතා කළා. 

මේ සරල මාර්ග උපදේශනය හරහා ඔබට අලුතෙන්ම බ්ලොග් අඩවියක් සාදා ගැනීම කළ හැකි යැයි මා සිතනවා.
ඔබගේ බ්ලොග් අඩවියේ වැඩිදියුණු කිරීම්, අලුතින් පහසුකම් එක් කිරීම් වැනි දේ සිදු කළ හැකි ආකාරයන් ගැන අන්තර්ජාලයේ විවිධ ලිපි අති විශාල ප්‍රමාණයක් තිබෙනවා. ඒවා පරික්ෂා කර ඔබගේ බ්ලොග් අඩවිය තවත් වැඩි දියුණු කර ගැනීමට ඔබට පුළුවන්.

වෙනත් තාක්ෂණික උපදෙස් අවශ්‍ය නම් ඊට හැකි අයුරින් සහය දෙන්නම්.

මම මේ පෝස්ට් එක පොඩි ebook එකකට කැටි කරල තියෙනව. ඔයාලට පහත සබැඳියෙන් ගිහිල්ල ඒක භාගත කරගෙන කියවන්න උනත් පුළුවන්.

කට්ටියත් එක්ක බෙදා හදා ගන්න ඔබට නිදහස තිබෙනවා.

https://goo.gl/9AR2GW
හෝ
https://www.mediafire.com/file/zc3je7sbyrc127d/Blogger+%E0%B7%80%E0%B6%BD%E0%B7%92%E0%B6%B1%E0%B7%8A+%E0%B6%B6%E0%B7%8A%E0%B6%BD%E0%B7%9C%E0%B6%9C%E0%B7%8A+%E0%B6%91%E0%B6%9A%E0%B6%9A%E0%B7%8A+%E0%B7%84%E0%B6%AF%E0%B6%B8%E0%B7%94+Madhawaweblog.pdf



Tuesday, September 5, 2017

කිසිදා තෘප්තිමත් වන්නට එපා



"ලද දෙයින් සතුටු වන්න" කියල කියමනක් තිබෙනවා තමයි. නමුත් මේක හැම අවස්ථාවකටම තෘප්ත වන්නේ නෑ. 
“The drive to close the gap between near-perfect and perfect is the difference between great and unstoppable.” — Tim Grover
ටිම් ගෲවර් කියන්නෙ ප්‍රසිද්ධ මලල ක්‍රීඩකයෙක්. ඔහු කියනව ආසන්න වශයෙන් පරිපූර්ණ තත්වයේ සිට පරිපූර්ණත්වයට යනව කියන්නෙ ඔබ බලවත් කෙනෙකුගෙන් නොනැවැත්විය හැකි පුද්ගලයෙකු බවට පත් වනවා කියන එකයි කියල. 

ඔබ ඔබගේ ඉලක්කයක් සපුරා ගත්තත් ඔබ තෘප්තිමත් නොවිය යුතුයි. 
එය ඔබට ඉලක්කයක් නොවිය යුතුයි. ඔබට කෙතරම් එහි ඉදිරියට යා හැකිද යන්න ඔබ බැලිය යුතුයි. 

ඔබ ඉන් අකෘතඥ පුද්ගලයෙකු වනවාද??? 
අනිවාර්යයෙන්ම නෑ.
ඔබ නිහතමානී කෘතඥ පුද්ගලයෙක්, ඔබගේ ජීවිතයට, හා ලැබී ඇති සැම දේටම.
අන්න ඒ නිසාම තමයි ඔබ කිසි සේත්ම කම්මැලි හා තෘප්තිමත් නොවන්නේ.

ඔබට ජීවිතය සතුටින් ගෙවිය හැකි වන්නේ එක් ඉලක්කයක් සපුරාගෙන එහි නැවති සිටීමෙන් නොව, එම සාර්ථකත්වය පසෙකින් තබා නව ඉලක්කයක් වෙත ගමන් කිරීමෙන්.

සාර්ථකත්වය භුක්ති විඳිමින්, සාර්ථකත්වයේ මේසය මත වැඩි වේලා රැඳි නොසිටින්න. 
තවත් කෑම වේලක් ලබා ගැනීමට නම් මුලින්ම බඩගින්න ඇති කර ගත යුතු වනවා. 
ඉතින් බලා නොසිට යළිත් නව ඉලක්කයක් කරා යොමු වන්න. 

Sunday, August 20, 2017

දැන් බ්ලොග් ලියන්න හරි පහසුයි



ඔන්න මමත් voice typing කරන්න හදන්නේ. මේ voice typing වලින් මම කරන පලවෙනි බ්ලොග් පෝස්ට් එක. මම මේ සඳහා පාවිච්චි කරන්නේ හෙළකුරු sinhala voice typing app එක. වෙලාවකට පොඩි පොඩි පිස්සු වචන දැම්මත් මේක මාර ම effective කියල නම් තේරෙනවා.
මේ හරහා සිංහල ටයිප් කිරීම ඉතාම පහසු වීම නිසා අනිවාර්යෙන්ම තව සිංහල බ්ලොග් නං ලියවෙයි කියලා මට හිතෙනවා. සිංහල ටයිප් කරන්නට බැරි අයට නම් මේක හොඳ විසඳුමක්. සිංහල ටයිප් කිරීමට වඩා ඉතාම වැඩි වේගයකින් sinhala ටයිප් කිරීමට හැකිවීම නිසා අපිට බ්ලොග් ලිපියක් ලිවීමට යන කාලය ඉතාම අඩු වෙනවා. මේ බ්ලොග් ලිපිය ලිවීමට මට විනාඩි 2-3 වඩා නොයන බව නම් අනිවාර්යෙන්ම ෂුවර්.
මෙහි තිබෙන තවත් විශේෂ වාසියක් වන්නේ අපි හට ඇඳේ දිගා වී විවේකීව කැමති විදියකට වාඩි වී හෝ ඇල වි ලිපියක් ලිවීමට හැකියාව ලැබීමයි.
 අවසාන වශයෙන් කිව්වොත් මේක නම් සුපිරි.
මම මේක දිගටම use කරාවි.
එහෙනම් දැනට ආයුබෝවන් යලිත් හමුවෙමු.

ප.ලි. මේ කොටස ලියන්නෙ පරිගණකයෙන්. වොයිස් ටයිප් කරනකොට වැරදි වචන ටයිප් උනු ඒව නම් හරිගැස්සුව.
මේක ලියද්දි උඩ ලියනවට වඩා වැරදුනාද මන්ද. :D :D :D 



Saturday, August 12, 2017

ගෙදර භාවිතයට පොඩි Solar Electricity System එකක් අපිම හදමු. FINAL


මම ඉස්සෙල්ල පෝස්ට් එකක් ලිව්ව මේ ගැන. හැබැයි ප්‍රායෝගික දැනුමක් රහිතව. හොයල බලල, අහල බලල, කියවල බලල ගත්තු දැනුමෙන්. (http://madhawaweblog.blogspot.com/2017/02/diy-solar-lighting-system.html
ඉතින් ඒ දැනුමත් එක්ක මමම සිස්ටම් එකක් හැදුව. පොඩි එකක්. සරළ එකක්. ඒ ගැන කියන්නයි දැන් හදන්නෙ.

මම හදපු සිස්ටම් එක ගැන සරළව.
150W Solar Panel with 180Ah Battery Backup and 1000W Inverter with DC Lighting

වොට් 150 සෝලර් පැනල් එකක් භාවිතා කරල තමයි හැදුවෙ. භාවිතයෙන් ඉවත ලූ 90Ah Deep Cycle Batteries දෙකක් දාල ඉන්වර්ටර් එකකින් 230V වලට හරවන්න හැදුවෙ. ඒත් එක්කම 12V output එකක් භාවිතා කළා බල්බ් කිහිපයක් දල්වන්න.

මගෙ සිස්ටම් එකේ ඡායාරූප කිහිපයක් පහතින්.

පැනල් එක වහලය උඩ සවි කර ඇති අන්දම

බැටරි බැක් අප් එක (UPS එක ගැන වෙනමම කියන්නම්)

මගෙ control panel එක. සරළයි නේද? (Connection දීල නැති ඒව ගැනත් කියන්නම්)

"ඔය පොඩි එකටද ඔච්චර ඇඩ් එකක් දුන්නෙ???" කියල හිතුනද?
කමක් නෑ. එහෙම තමයි ඉතින් මුලින්. :) 

අවශ්‍ය උපකරණ


මට මිස් උනා insulation tape එක, Hacksaw Blade එක, කියත, Measuring Tape එක. මේ හැමදෙයක්ම උවමනා නෑ. ශේප් කරගන්න පුළුවන් නම්. 

අවශ්‍ය උපකරණ හා වියදම්

කියන්න එපැයි වැදගත්ම දේ.
Budget එක. හැමෝම අහන්නෙ මේකනෙ. මේ මගෙ වියදම් විස්තරය. 

Description
Unit Price
No. of Units
Price
Buy from
Solar Panel 150W (12V)
14000
1
14000
local
Charging Controller (30A)
1129.8
1
1129.8
ebay
LED 25W
250
3
750
Local
90Ah Battery (12V)
2700
2
5400
Local, Used
12->220V 1000W inverter
3249.4
1
3249.4
ebay
Wires (15A and 5A)

 7m, 5m
800
Local
15A 2 pole Breaker
750
1
750
Local
Watt Hour Meter
2457
1
2457
ebay
Misc
1054

1054
Local
Total


29590.2


පැනල් එක ගත්තෙ කඩවත ලලිත් මහතාගෙන්. ඔහු ලඟ ඔනෑම සයිස් එකක පැනල් තියෙනව 10-250W. ඉක්මන් එකේ ඇඩ් තියෙනව. (Lalith Amarasinghe)
Charging Controller (30A) and Inverter (MPPT Modified Sin Wave, 1000W) ගත්තෙ eBay. හැබැයි ඉතින් ඒවයෙ durability ගැන නම් සහතිකයක් නෑ. ඉතින් මම තව charging controller එකක් ඕඩර් කළා. inverter එකට බැකප් එක වෙනුවට තමයි මගෙ අවුරුදු 12ක් පරණ UPS එක සවි කරල තියෙන්නෙ.

12V LED Bulb නම් හැමතැනම ගන්න තියෙනව හුඟක් අඩු මිලට. ලලිත් මහතා ලඟත් තිබෙනව. මම ඔහුගෙන් 25W වගේ LED බල්බ් 3ක් ගත්ත. 
මෙතන බැටරි වලට මම රු.2700‍x2 ක් දාල තියෙනව. භාවිතයෙන් ඉවත ලූ Deep Cycle Battery මිල වෙන්නෙ රු. 8000 සිට ඉහළට. (75Ah වලින් ඉහළට) නමුත් මට ඔය බැටරි දෙකටම ගියේ රු.5400යි. ඒ මිලට නම් හොයන්න අමාරු වෙයි. එතනින් තමා සිස්ටම් එකේ මිල ලොකුවටම වෙනස් වෙන්නෙ. (මගෙ මුළු වියදම රු. 29,600ක් වගේනෙ. මාකට් එකේ තියෙන බැටරියක් ගන්නකොට ඔයාලගෙ වියදම තව රු. 3000-4000කින් වගේ වැඩි වෙයි.)
පැනල් එකෙන් කොන්ට්‍රෝලර් එකට, කොන්ට්‍රෝලර් එකෙන් බැටරියට 15A වයර් භාවිතා කළා ඇම්පියක් 8-9ක් උපරිම පැනල් එකෙන් එක නිසා. 15A දැම්මෙ මගෙ බලාපොරොත්තුවක් තියෙන නිසා තව 150W panel එකක් සවි කරන්න මේකට)
බැටරිය, සිස්ටම් එකෙන් වෙන් කරන්න තමයි 15A 2 Pole Breaker එක භාවිතා කළේ.
ඡායාරූපයේ තිබෙන 5A Breaker එක මම සවි කළේ බැටරියෙන් inverter එක වෙන් කරන්න. දැනට මම inverter එක සම්බන්ධ කරල නෑ. බැකප් එකට තියන් ඉන්න UPS එකේ ඉන්වර්ටර් එක තමා භාවිතා කරන්නෙ 230V ගන්න.
අමතර වියදම් ගියේ, පැනල් එක ගහල තියෙන ලෑල්ල, ඉස්කුරුප්පු ඇණ, කනෙක්ටර්, පැනල් එකට වයර් සම්බන්ධ කරන්න භාවිතා කරන සොකට්, ඩිජිටල් වෝල්ට් මීටර්, rail mount, ස්විච් වගේ දේවල් වලට. 

Electronic Watt Hour Meter එකක් සවි කරන්න ඉන්නව. eBay එකෙන් දැම්ම තාම ආවෙ නෑ. ඒකෙ මිලත් මම උඩ එකතු කරල තියෙන්නෙ. 

ගණනය කරන ආකාරය
මම මේ කියන්නෙ ඉතාම සරළ ආකාරයේ ගණනය කිරීමක්. මීට වඩා සංකීර්ණව හා වඩා නිවැරදිව ගණනය කරන්න පුළුවන්. 

විදුලිය භාවිතය
අපි මේකෙන් දිනකට ගන්න බලාපොරොත්තු වෙන බලශක්තිය කොච්චරක්ද කියල මුලින්ම අදහසක් ගන්න ඕනෙ. අපි හිතමු දවසකට පැය 4කට වොට් 150ක් ගන්නව කියල. 
ඒ කියන්නෙ 600Wh

පැනලය තෝරා ගැනීම
ඊට පස්සෙ අපි හිතමු දිනකට පැය 4ක හොඳ හිරු එළියක් තිබෙනවා කියල. එතකොට තමා පැනල් එකෙන් සම්පූර්ණ බලශක්තිය ලබා දෙන්නෙ. 
එතකොට 600Wh නිපදවන්න අවශ්‍ය පැනල් එකේ සයිස් එක වෙන්නෙ 600Wh/4h = 150W.
Loss එක zero කියල උපකල්පනය කළොත් 150W පැනල් එකක් තිබ්බ නම් එතකොට ඇති. 

150W Panel එකෙන් දෙන්නෙ 12V DC Out එකක්. එතකොට ඉතිරි සියළුම දේවල් 12V වලට ගැළපෙන්නයි ගන්න ඕනෙ. 
150 හා ඊට අඩු ඒව 12V. 150W වලට වැඩි ඒව 24V තමයි out කරන්නෙ. 

ඉන්වර්ටර් එකේ loss එක 20%ක් කියල ගත්තොත් 190W පැනල් එකක් ඕනෙ වෙනව වැඩේට. අපි ඒ අමතර 40W අර උඩ කිව්ව සූර්යාලෝකය ලැබෙන පැය 4ට අමතර පැය වලින් නිපදවෙන විදුලියෙන් කපා හරිමු. එතකොට 150W Panel එකක් අපිට ඇති. 

150W panel එකක උපරිම output Current එක 8.7A වගේ. ඒ ගණන හිතාගෙන අනිත් ගණනය කිරීම් කරන්න. 

Charging Controller and Wiring
එහෙම බැලුවම 150W system එකක් හදාගන්න ඕනෙ කරන උපකරණ, වයර්, 10A වලට ගැළපෙන්න හදාගන්න. හැබැයි මම කියන්නෙ අනාගතේ ගැන හිතල තව ටිකක් upgrade කරන්න බලාගෙන ඉඩ තියාගෙන හදන්න. මම හැදුවෙ 300W වලට upgrade කරන්න පුළුවන් වෙන්න. 

Inverter
150W ගන්න නම් ඉතින් 250W Inverter එකක් ඇති වෙයි. එතකොට මිල තව ටිකක් අඩු වෙයි උඩ මම කියල තියෙන ගණනට වඩා. 

බැටරි
deep cycle battery තමා මේකට හරියටම හරියන්නෙ. මොකද ඒව තමා ගැළපෙන්නෙ හෙමින් චාජ් වෙලා හෙමින් ඩිස්චාජ් කරන්න. අනිත් එක වැඩි කාලයක් විදුලිය ගන්න ගැළපෙන්නෙත් ඒව. ඒව අලුත්ම එකක් නම් ගොඩක් මිලයි. භාවිතයෙන් ඉවත් කරපු එකක් හොයාග්ංඅන්න ට්‍රයි කරන්න. බැරිම උනොත් starter battery එකක් භාවිතා කරන්න. (ඒකෙන් ගන්න පුලුවන් තියෙන capacity එකෙන් බාගයයි කියල හිතල ගණනය කිරීම් කරන්න. 
ඉතින් 150W පැය 4ක් ගන්න නම් ඉන්වර්ටරයක් භාවිතා කරමින්, . 
අපි හිතුවොත් 200Wක් (Inverter loss එක එකතු කරල), පැය 4 ක් ගන්න ඕනෙ කියල, ගණං හැදුවම අපිට එනව 67Ah කියල. ඒ කියන්නෙ 90Ah බැටරි එකක්වත් ඕනෙ වෙනව. 

ඉහත ගණනය කිරීම් න්‍යායත්මක මට්ටමෙන් කරල තියෙන්නෙ. ඉතින් සත්‍ය තත්වය වෙනස් වෙන්න පුළුවන් අඩු හා වැඩි පැත්තට. 

ඉතින් උපකරණ ටික හරි නම් වැඩේ ආරම්භ කරන්න තියෙන්නෙ.

Wiring සිදුකරගන්නා ආකාරය 
මේ තියෙන්නෙ මම මුලින්ම කුරුටු ගාපු කටු සටහනක්.


ඕක අමතක කරන්නකො. මෙන්න මේක තමා මගෙ wiring diagram එක.  



ඕකෙ විදිහට තමා එතකොට අමුණන්න ඕනෙ. 

නම් කරල තියෙන ඒව නම් ගැටළුවක් නෑනෙ. අංකනය කරල තියෙන ඒව ගැන ආපහු පොඩ්ඩක් කියන්නම්.
1. 15A Cable භාවිතා කරන්න.
2. DC විදුලිය ගන්න Outputs ටික මම වෙනම කොටසකට සෙට් කළා. 12V හා 5V output ගන්න කොටස් ටික සවි කරගන්න පැනල් එකේ කොටසක් වෙන් කළා. 5V outputs තාම සවි කළේ නෑ. 
3. 15A Cable භාවිතා කරන්න. (1/.178)
4. 5A Cable භාවිතා කරන්න. (1/.113)
5. WH Meter
6. ගෙදර Socket Outlet එකක්. 

පැනලය සවි කිරීම
එක එක අය එක එක දේවල් කියනව. ඉතින් මට හොඳම කියල හිතුව විදිහට කළා. හරිම කියල හිතුනෙ නිරිතට අංශක 15ක් ඇල කරල සවි කරන එක. මම සවි කළේ බටහිරට අංශක 20ක විතර ඇලයක් තියල. උළු වහලය උඩ නිසා ඇලය පොඩ්ඩක් වැඩියි. නමුත් මට ඒක අවුලක් වෙන එකක් නෑ කියල හිතල තමා එහෙම සවි කළේ. වහලයේ පහලින් සවි කරල තියෙන නිසා වහලයට වඩා ඇලය අඩු කළාට වැඩක් නෑනෙ හිරු එලිය ඒ කෝණයෙන් තියෙනකොට එන්නෙ නැති නිසා. 

පැනලයේ සිට Charging Controller එකට 15A වයර් එකක් තමා ඇදල තියෙන්නෙ. මේක පුළුවන් තරම් කෙටි වෙන තරමට හොඳයි. නමුත් තට්ටු දෙකක් පහළට ආවට අවුලක් නෑ. 

Charging Controller එකෙහි වැදගත්කම
ඇයි මේක භාවිතා කරන්නෙ?
බැටරි ආරක්ෂා කරගන්න. මොකද දන්නවද, මේක නැති උනොත් බැටරිය over charge හා over discharge වෙලා බැටරියේ ආයු කාලය අඩු වෙනව. ඉතින් මේක අත්‍යවශ්‍ය වෙනවා. 

Inverter එක සවි කිරීම
Inverter එක කෙලින්ම බැටරියට සවි කරන්න. මොකද ඒකෙන් ගන්න ලොකු ඇම්පියර් ගාණ Charging Controller එකට දරන්න බැරිව Charging controller එක ඉක්මනට පිච්චෙන්න ඉඩ තියෙනව.  
ඒක බැටරි වලින් වෙන් කරන්න ස්විච් එකක් දාන්න. මම අර 5A Breaker එක දාල තියෙන්නෙ ඒකට. වයර් සම්බන්ධ කරල නැත්තෙ දැනට මම ඒ ඉන්වර්ටර් එක භාවිත නොකරන නිසා. 

Control Panel එක සකසා ගැනීම 
Plywood Sheet කෑල්ලක් හොයා ගත්තම ඉහත කොටස් ටික පිළිවෙලට අමුනගන්න පුළුවන්. ඩ්‍රිල් එකක් තිබ්බ නම් ලේසී වයර් සවිකරන්න සිදුරු ටික හදා ගන්න. මම නම් ඇලිස් කටුවෙක් හෙමීට සිදුරු කරගත්ත. 
මගෙ Control Panel එක තමා උඩ දාල තිබ්බෙ. ඒක බිත්තියට සවි කරගන්න ඕනෙ. තාම ඒක කළේ නෑ. වයර් ටිකත් කේසිං වල දාල පිළිවෙළක් කරන්න ඕනෙ. 
බෝඩ් එකේ ඉඩ තියල තියෙන්නෙ Backup Charging Controller, Backup Inverter, Watt Hour Meter, 12V, 5V outputs ports සවිකරගන්න. 

හරියට සවි කරගත්ත නම්, 
යන්තම් හරි එළිය තියෙනව නම්, Charging Controller එකේ "Solar" කියල සඳහන් වෙලා තියෙන බල්බය දැල්වෙන්න ඕනෙ. (මගෙ එකේ නැත්තෙ, මම ෆොටෝ එක ගත්තෙ රෑ 12.30ට)
බැටරියෙ විදුලිය තියෙන ප්‍රමාණය අනුව Battery Level එකට අදාල LED දැල්වෙයි. (මගෙ එකේ 12.7 වගේ තිබ්බෙ. ඒකයි LED 2/3ක් දැල්විලා තියෙන්නෙ. 
DC Load එකක් සම්බන්ධ කරල තියෙනව නම් LOAD කියල තියෙන LED එක දැල්වෙයි.



හරි. දැන් අපේ සිස්ටම් එක හදල අවසානයි හා වැඩ කරනව. දැන් ඉතින් දෙය්යනේ කියල LED ටිකක් සවි කරගෙන, නැත්තම් inverter එකෙන් ගෙදර විදුලියට සම්බන්ධ කරගන්න තියෙන්නෙ. 

සැළකිය යුතුයි.
ගෙදර විදුලියට සම්බන්ධ කරනකොට අනිවාර්යයෙන්ම ගෙදර distribution panel එකේ Main Switch හා Trip Switch Off කරන්න. 

මෙම ඉන්වර්ටරයට සම්බන්ධ කළ හැකි හා නොහැකි උපකරණ
අඩු විදුලියක් ගන්න LED බල්බ්, LED TV, Table/Pedestal Fan, Radio, Equipment with DC Adapters කිසි අවුලක් නැතිව පුළුවන්. 
MPPT Modified Sin Wave Inverter වල තියෙන්නෙ real sin wave එක නෙමෙයි. ඒ වගේ digital wave එකක්. ඉතින් real sin wave ඕනෙ කරන උපකරණ දුවන්න බෑ. උදා: මෝටර්
ඒ වගේම Starting Current එක වැඩි උපකරණ දුවන්න බෑ. උදා: ශීතකරණය, වතුර මෝටරය, CRT TV. හැබැයි inverter type fridge වැඩ කරන්න පුළුවන්.

DC 12V වලින් භාවිතා කළ හැකි උපකරණ මොනවද
LED Bulbs කවුරුත් දන්නවනෙ. ඊට පස්සෙ ෆෑන්. සමහරු දන්නෙ නැතිව ඇති, 12V වලින් වැඩ කරන වතුර මෝටර්, විදුලි ස්ත්‍රික්ක, Pedestal Fans එහෙමත් තියෙනව කියල. ඔය ඔක්කොම අර උඩ කිව්ව කඩවත ලලිත් මහතා ලඟ තිබෙනව.
ඒවාට අමතරව 12v වලින් වැඩ කරන ශීතකරණත් තිබෙනව. නමුත් ලංකාවෙ නම් දැනට නෑ.
සිගරට් ලයිටර් හෝල්ඩර් එකට ගහල ක්‍රියාත්මක කරන්න පුළුවන් විදුලි ඉලෙක්ට්‍රොනික උපකරණත් අපිට මේකෙන් වැඩ කරවගන්න පුළුවන්. තියෙන්නෙ කාර් වල සිගරට් ලයිටර් හෝල්ඩර් එකට ගහන සොකට් එකක් ගෙනත් මේකට සවි කරගන්න එක විතරයි.

ඉතින් මෙච්චර තමයි මගෙ ප්‍රොජෙක්ට් එක.
ඔයාලත් මේ වගේ ගෙදර පොඩි වැඩකට Off Grid Solar System එකක් හදාගන්නව නම් නිවසේ විදුලි බිල පොඩි ප්‍රමාණයකින් අඩු කරගන්න පුළුවන්. මගෙ ඉලක්කය යුනිට් 20ක් අඩු කිරීම. ඒ හරහා එන ඉතිරියෙන් මගෙ සිස්ටම් එකේ වියදම වසර 2-3 අතර කාලයකින් මට කවර් කරගන්න පුළුවන්.

ඔයාලත් සිස්ටම් එකක් හදනව නම් මගෙ දැනුමෙ හැටියට දෙන්න පුළුවන් සහයක් දෙන්නට පුළුවන්. මොනව හරි උපාංගයක් සොයා ගන්න අපහසුතාවයක් තිබ්බොත් ඒකටත් සමහරක් විට මට සහය වෙන්නට පුළුවන් වෙයි. මතක් කරල පරණ ලිපියත් කියවන්න. මේකෙ නැති දේවල් ඒකෙ තියෙනව.
 (http://madhawaweblog.blogspot.com/2017/02/diy-solar-lighting-system.html)

ගැටළු කමෙන්ට් වල දාන්න. මම දන්න විදිහට උත්තර දෙන්නම්.

සිස්ටම් එකක් හැදුවොත්, ඔයාලගෙ අත්දැකීම් අපිටත් කියන්න කියල ආරාධනා කරනව.

මේක මට අත්දැකීමක් එකතු කරගන්න විශේෂයෙන්ම හදපු එකක් මිසක් ලොකු ඉතිරියක් ප්ලෑන් කරල හදපු එකක් නෙමෙයි. නමුත් තත්වය බලල ඉතිරිය වෙනුවෙන් මේක වැඩිදියුණු කරන්න නම් ඉඩ තිබෙනවා.

මේ ලිපියට එන කමෙන්ට් හරහා හැමෝටම තවත් ඉගෙනගන්න දේවල් ලැබෙයි. ඉතින් කමෙන්ට් වලට සබ්ස්ක්‍රයිබ් වෙන්න. එතකොට ඔයාලටත් ඒ දැනුම ලැබෙනවා.

එහෙනම් හරිත යුගයකට සුභ පැතුම්!!!


------------------
මේ වගේ මට එක එක වෙලාවට හිතට එන ප්‍රොජෙක්ට් මම කරනව.
ඔයාලට මතක ඇති සමහරවිට, මම මීට ඉස්සෙල්ල කරපු ප්‍රොජෙක්ට් එක තමයි ඔන්ලයින් බිස්නස් එකක් ස්ටාට් කරන්න ටෙස්ට් කළ එක. ඒක නම් ගොඩක් සාර්ථක උනා. ඒ අත්දැකීම තමයි මම මේ පෝස්ට් එකෙන් බෙදාගත්තෙ.
http://tyroclub.blogspot.com/2016/10/start-your-own-business.html

තවත් ප්‍රොජෙක්ට් එකකින් හමුවෙමු.

තාම හිතනව ඊළඟට මොකද කරන්නෙ කියල. දැනට අදහස් කිහිපයක් තියෙනව.
1. CCTV Camera System එකක් ගෙදරට
2. Arduino වලින් Smart Home
3. Arduino වලින් remote controlled car
4. මාළු ටැංකියක් සෑදීම

ඔයාටත් අදහස් තියෙනව නම් මට කියන්න.


Wednesday, June 21, 2017

ඔව් මට පුළුවන්

නව අවස්ථා වලට "ඔව්" කියන්න.
මිනිසුන් හට "ඔව්" කියන්න.
දුෂ්කර අවස්ථා වලට "ඔව්" කියන්න.
අන්‍යන්ගෙන් "ඔව්" යන්න කියවා ගත හැකි පරිදි ධනාත්මක ප්‍රතිචාරයන් ලබා ගැනීමට උගනින්න.
"ඔව්. කැමතියි" යන්න මුළු හිතින්ම, හැඟීමකින්ම කියන්න.



"ඔව්"  කියන්නෙ හරිම ප්‍රභල වචනයක්. හරිම ධනාත්මක වචනයක්.
ඒක අපේ ජීවිතයට ලං කරගන්න ලං කරගන්න අපේ වැඩ හුඟක් සාර්ථක වෙනව. 

"නෑ", "බෑ", "ඕව හරියන්නෙ නෑ", "මට මේක බෑ", "මම දන්නෙ නෑ" වගේ දේවල් අපි හුඟක් දෙනෙක්ගෙ වාග් කෝෂ වල බහුලව තියෙන වචන, වාක්‍ය. මේව හරිම සෘණාත්මකයි කියන්නෙ අහන කෙනාටත් ඒ "බෑ සංකල්පය" ප්‍රේරණය වෙනව. 
මේව ටික, "ඔව්", "පුළුවන්", "මේක හරියනව", "මට මේක පුළුවන්" වගේ ධනාත්මක දේවල් වලට හරවගෙන අපිට හිතන්නට, වැඩ කරන්නට පුළුවන් නම් කොහොමද?
අනිවාර්යයෙන්ම ඉහළ සාර්ථකත්වයටකට යන්නට අපි හැමෝටම පහසුවෙන්ම පුළුවන් වෙනව.

ඒක කරන්න තියෙන්නෙ හරිම සරළ දෙයක්. "නෑ", "බෑ" කියන වචන අපේ වාග් කෝෂයෙන් පමණක් නෙමෙයි, අපේ හිතෙන්ම ඉවත් කරන්න ඕනෙ.

"ඔව්, පුළුවන්" කියන එක අපි මුළු හිතින්ම, මුළු ගතින්ම වැළඳගෙන පවසන්න ඕනෙ.

ඔබටත් පුළුවන්. මටත් පුළුවන්. 
ඉතින් ඇයි අපි නොකර ඉන්නෙ???



Sunday, June 18, 2017

අන්තර්ජාලය හරහා භාණ්ඩ විකුණන/මිලට ගන්නා ඔබගෙන් සහයක් අවශ්‍යයි


මම පොඩි සමීක්ෂණයක් කරනවා ලංකාවෙ අන්තර්ජාලය හරහා භාණ්ඩ විකුණන්නන් හා භාණ්ඩ මිලට ගන්නන්ගේ රටාවන් සම්බන්ධයෙන්. ඉතින් මම ඒකට පොඩි ප්‍රශ්නාවලියක් හැදුව. 
ඔබ ලංකාවේ ජීවත් වන,  අන්තර්ජාලය හරහා භාණ්ඩ විකුණන හෝ භාණ්ඩ මිලට ගන්න පුද්ගලයෙක් නම් ආරාධනා කර සිටිනවා මෙම ප්‍රශ්නාවලියට පිළිතුරු සපයල මට හැකිතරම් තොරතුරු එකතු කරගන්න සහය වන්නට කියා.

ප්‍රශ්නාවලියට සබැඳීය.

මෙයින් ලබා ගන්නා තොරතුරු විශ්ලේෂණය කර ලැබෙන නිගමන ඔබ සමඟ මම අනාගතයේදී බෙදාහදා ගන්නම්.
හැකියාවක් තිබෙනවා නම් මෙම පුවත ඔබගේ මිතුරන්ටත් පවසන්න. එවිට මට මෙහි නිරවද්‍යතාවය ඉහළ නංවා ගන්නට හැකි වේවි.

ස්තුතියි. 

මානසික අක්‍රමිකතා වලින් මිදෙන්නේ කෙසේද

මුලින්ම කියන්න ඕනෙ, මම මානසික වෛද්‍යවරයෙක් නෙමෙයි. ඉතින් ඔබට බරපතල මනසික අක්‍රමිකතාවයක් හෝ මානසික ගැටළුවක් තිබෙනවා නම් ඔබ වහාම සුදුසුකම් ලත් මානසික වෛද්‍යවරයෙක් හමුවන්න.
ඒ කෙසේ වෙතත් මිතුරෙක්ට හෝ නෑදෑයෙක්ට හෝ ඔබගේ මවට, පියාට, සහෝදරයෙකුට, සහෝදරියකට පවසා ඔබගේ ගැටළුවට යම් සහනයක් ලබාගන්නට උත්සාහ කළ හැකියි. (එහෙම සමහරක් මගේ මිතුරු මිතුරියන් මා සමඟත් කතා කර යම් විසඳුම් ලබාගෙන තිබෙනවා.) 

මම මෙතන කතා කරන්න බලාපොරොත්තු වන්නේ යම් සරළ දේවල් ටිකක්. මීට අමතරව තවත් බොහෝ දේ තිබෙනවා. 



1. බලාපොරොත්තු සහිත වන්න.
බලාපොරොත්තුව කියන්නෙ හරිම පුදුම දෙයක්. හුඟක් ප්‍රශ්න ඒකට විසඳන්න පුළුවන්. දෙවියො පැන්ඩෝරාට අර රහස් පෙට්ටිය දීල කිව්වලුනෙ පොළවට යනකම් ඒක ඇරල බලන්නෙපා කියල. ඒත් පැන්ඩෝරාට තිබ්බ නොඉවසිල්ල නිසා ඇය මඟදිම පෙට්ටිය ඇරියලු. එතකොට ඒකෙ තියෙන දේවල් එලියට හැලුනලු. කලබලේට පැන්ඩෝරා පෙට්ටිය වැහුවත්, අන්තිමට පෙට්ටිය ඉතුරු උනේ "බලාපොරොත්තුව" විතරයිලු.
ඉතින් මිනිස්සුට තියෙන ලොකුම වත්කමක් තමයි මේ බලාපොරොත්තුව. බලාපොරොත්තුව හිතේ තියාගෙන අපට තිබෙන මානසික පීඩනයෙන්, ගැටළු වලින් සහනයක් ලබන්නට අපට පුළුවන්.

2. ඔබගේ ගැටළු සමභ සටන් නොකරන්න.
ගැටළු තියෙන්නෙ විසඳන්න. නැතිනම් අතෑරල දාල ඉන්න. ඒවත් එක්ක අපි සටන් කරන්න සටන් කරන්න ගැටළුව ශක්තිමත් වෙලා අපිව තලා පෙලා දානව. ඉතින් ගැටළුවට නිදහසේ සාමකාමීව මුහුණ දෙන්න. සටන් කරල කරල අන්තිමට වෙන්නෙ අපිම වෙහෙසට පත් වෙන එක විතරයි.

3. බියට මුහුණ දෙන්න.
බිය කියන්නෙ අමුතුම දෙයක්. මිනිස්සු හැම දේටම බිය වෙනව. අඳුරට, අවතාර වලට, යක්කුන්ට විතරක් නෙමෙයි, ප්‍රශ්න වලටත්. ප්‍රශ්න වලට බය උනොත් අපිට හිත නිදහසේ ජීවත් වෙන්න බැරි වෙනව. 
එහෙම බය උනු අය තමයි ඔය සියදිවි නසාගන්නෙ. ඒ ගැටළු වලට මුහුණ දෙන්න බය වෙලා. 
ඉතින් කිසිම අවස්ථාවට ප්‍රශ්න වලට බයවෙන්නෙපා. ප්‍රශ්න වලට ඔයාව බය කරන්න දෙන්නත් එපා. ප්‍රශ්න වලට නිර්භීතව මුහුණ දෙන්න.

4. තමා සිටින තත්වය තමා පිළිගන්න.
සමහරු ඉන්නව තමන් ඉන්නෙ කොයි වගේ තැනකද කියල තේරුම් ගන්නෙ නැති අය. සමහර ප්‍රශ්න නැති අය ඒ ගැන හිතල මානසිකව වැටෙනව. සමහර ප්‍රශ්න තියෙන අය ඒව ගැන හිතල මානසිකව වැටෙනව. තමන් ඉන්නෙ මොන වගේ තත්වයකද කියල තේරුම් ගන්න ඕනෙ. 
සමහර ප්‍රශ්න තියෙනව එතරම් හිතන්න අවශ්‍ය නැති ප්‍රශ්නයක් නොවන ප්‍රශ්න. සමහර ප්‍රශ්න තියෙනව හොඳින් සිතා බලා විසඳුම් හොයන්න ඕනෙ ප්‍රශ්න.
තමන්ගෙ තත්වය කිව්වම තවත් දෙයක් තියෙනව. ඔය කියන ප්‍රශ්න වලට මුහුණ දෙන්න අවශ්‍ය ආයුධ ආම්පන්න තමන් ලඟ තිබෙනවාද කියල තේරුම් අරගන්න ඕනෙ. ඒ ප්‍රශ්නයට මේ අවස්ථාවේ කෙලින්ම මුහුණ දෙන්න හෝ තාවකාලිකව පසුබහින්න හෝ වෙනත් දෙයක් සිදු කරන්න තමන් දැන් ඉන්න තත්වය යටතේ පුළුවන්ද කියල තමන් තේරුම් ගත යුතු වෙනවා.

5. අවදියෙන් සිටීමට ඉගෙන ගන්න.
වටපිටාව ගැන, පරිසරය ගැන විතරක් නෙමෙයි, තමන් ගැනම උනත් අවදියෙන් සිටින්නට ඕනෙ. මොකද අපි අපි ගැන, අපි වටේ සිදු වෙන දේවල් ගැන අවදියෙන් සිටියෙ නැති නම් තියෙන ගැටළු කොහෙද යන්නෙ, ගැටළු එක්ක පුළුවන් අවස්ථා, තැන් මොනවද කියල අපිටම තේරුම් යන්නෙ නෑ. අරම අවදියෙන්, අවදානයෙන් හිටියොත් අපිට පේන්න ගන්නව අපිට ගැටළු එන්නෙ කොතනින්ද, කොහොමද කියල. එතකොට අපිට ඒව වෙනුවෙන් ප්‍රතික්‍රියා කරන්න තවත් කාලය ලැබෙනව.

6. කරදර වලින් පාවෙලා ඉවතට යන්න.
සමහර ප්‍රශ්න තිබෙනව එතරම් හිතන්නෙ නැතිව අතෑරල දාන්න පුළුවන් ඒව. නැතිනම් අපිට කිසිම අතුරු ආන්තරාවක් නැති ඒව. ඉතින් ඒ වගේ ප්‍රශ්න වලින් හෙමීට පාවෙලා ඉවතට යන්න.
මේ කියන්නෙ අපිට බලපෑමක් කරන්න ඕනෙ ප්‍රශ්න වලින්  එහෙම පැනල යන්න කියන එක නෙමෙයි හරිද. 

7. හැම වෙලේම කිසියම් වැඩක යෙදෙන්න.
ප්‍රශ්න හිතින් ඉවත් කරන්න පුළුවන්, මානසික අක්‍රමිකතා වලින් මිදෙන්න පුළුවන් ලේසිම ක්‍රමයක් තමයි, මොකාක් හරි වැඩක යෙදෙන එක.
අපිට පුළුවන් සින්දුවක් අහන්න, පොතක් කියවන්න, කවියක් පබඳින්න, වත්තෙ පිටියෙ වැඩක් කරන්න, ජිම් එකට යන්න, චිත්‍රයක් අඳීන්න, ටී වී එක බලන්න, වගේ විවිධ දේවල්.
මේ දේවල් වලින් අපේ හිත නිදහස් වෙනව, එහෙ මෙහෙ දුවන එක නවතිනව.

ඊලඟට ඔයාලගෙ හිතට වද දෙන ප්‍රශ්නයක් ආපු වෙලාවට මේ දේවල් පොඩ්ඩක් උත්සාහ කරල බලන්න. අනිවාර්යයෙන්ම සාර්ථකත්වයක් තියේවි. 

Wednesday, June 14, 2017

Are you a සබන්බෝල Man


මේක මම කාලෙකට ඉස්සර කියවපු දේකින් හදපු එකක්.
R U a සබන්බෝල Man,
Or a සම්බෝල Man,
Or a Footබෝල Man.
Be a අද Man.
Not a හෙට Man.

මොන විකාරයක්ද මේ කියන්නෙ???? නේද?

කවියෙ කියල තියෙන දේවල් ගැන පොඩ්ඩක් හිතුවොත්, කවියෙ තේරුම හිතට එනව. 
සබන්බෝල, සම්බෝල, ෆුට් බෝල, අද, හෙට. 

මොකද්ද මේ කියන්නෙ?

සබන් බෝල තියෙන්නෙ මොහොතයි. වෙන වෙන වැඩ කර කර හිටියොත් සබන්බෝල වල ලස්සන බලන්න බැරි වෙනව.
සම්බෝල කියන්නෙ දවසෙන් කාල ඉවර කරන්න ඕනෙ කෑමක්. ඊලඟ දවස වෙනකම් තියාගෙන හිටියොත් පිළුණු වෙලා විසි කරන්න වෙනව.
ෆූට් බෝලය කියන්නෙ කොච්චර පා පහරවල් කෑවත් ගෝල් එකටම යන්න දඟලන වස්තුවක්.
අද කරන්න තියෙන දේ අදම කරන්න ඕනෙ.
හෙට වෙනකම් ඉන්න හොඳ නෑ. එහෙම කල් දාන්න ගියොත් අන්තිමට පරක්කු වැඩි වෙන්න පුළුවන්.

මේ කවියෙන් ඔයාලගෙ ජීවිතයට ගන්න පුළුවන් දෙයක් ගන්න ආරාධනා කරනවා. 


මේ වගේ ජීවිතයට වැදගත් වෙන සරළ දේවල් ඉදිරියෙදි මම තවත් ඔයාලට දෙනව.
එකතු වෙලා ඉන්න.
Life-Guide කියන ටැග් එකෙන් මම ඒ ලිපි දානව.
http://madhawaweblog.blogspot.com/search/label/life-guide


ජයග්‍රාහී ජීවිතයකට සුභ පැතුම්!!!

හුඟ කාලෙකින් මේ පැත්තෙ


හුඟ කාලෙකින් බ්ලොග් එකේ ලියන්න බැරි උනා. වෙලාව තමයි ඉතින් නැත්තෙ, අනිත් එක විවිධාකාරයේ වැඩ වලට අතගහල නිසා එක එක වැඩ වලට ටික ටික වෙලාව දෙන්න එපැයි. ඒ කෙසේ වෙතත්, මේ දවස් වල නම් වෙලාව කියන එක ඇත්තෙම නෑ. 
කොහොම හරි ලියන්න නම් වෙලවක් වෙන් කළ යුතුමයි. මොකද ඒකනෙ මගෙ විනෝදාංශය.
මේ දවස් වල අලුත් විෂය පරාසයක් ගැන පොඩ්ඩක් මම අධ්‍යයනය කරනව. ඒ සම්බන්ධයෙන් පොඩි දේවල් ටිකක් ලියන්න බලාපොරොත්තු වෙනව. එතෙක් එකතු වෙලා ඉන්න.

සුභ රත්‍රියක්!!!

Friday, February 24, 2017

Solar Lighting System එකක් අපිම හදමු - DIY



තාම ප්ලෑනිං හොඳේ. 
දැන් හැමතැනම solar lighting systems ගැන කතාව. ආණ්ඩුවෙනුත් මේකට ලොකු තල්ලුවක් දුන්නනෙ.
කොහොම උනත් හොඳ වැඩක්. ණය පහසුකම් පවා දෙන නිසා මේක ඉස්සරහට යාවි කියල හිතෙනව. දැන් රජයේ ආයතන වලටත් ඕව හයි කරගෙන යනව. 

කොහොම හරි ඉතින් මමත් හිතුව අපේ ගෙදරටත් එකක් හයි කරන්න. හැබැයි අපේ ගෙදර බිල ඒකක 140-170 අතර තියෙන්නෙ. ඉතින් කෙලින්ම ලොකු සිස්ටම් එකක් හයි කරන එක එතරම්ම තේරුමක් නෑ. මොකද Payback period එක ගොඩක් වැඩියි.

මේ පහත තියෙන්නෙ CEB එකේ බිල හැදෙන විදිහ. 

Consumption per month(kWh)
Energy Charge (LKR/kWh)
Fixed Charge(LKR/month)
0-60
7.85
61-90
10
90
91-120
27.75
480
121-180
32
480
More Than 180
45
540


මේ තියෙන්නෙ විවිධ ඒකක ගණන් වලට බිල එන විදිහ.

Units
Bill
169
3,651.50
159
3,331.50
149
3011.50
139
2691.50
129
2371.50
119
2055.75
109
1778.25
99
1500.75
89
851.00
79
751.00

ඔයාලට පේනව ඇති, බිලේ ලොකු වෙනසක් වෙන්නෙ ඒකක 90 පනිනකොට හා ඒකක 180 පනිනකොට කියල. ඉතින් ඒකක 150ක සාමාන්‍යයක් තියෙන අපේ ගෙදරට ලොකු සිස්ටම් එකක්, ඒ කිව්වෙ 1kW, 2kW වගේ සිස්ටම් එකක් දාගන්න එක එතරම් තේරුමක් නෑ. යුනිට් 180 පනිනව නම් අනිවා 2-3kW වගේ එකක් සවි කරගන්න එක නම් ගොඩක් වටිනවා. (සාමාන්‍යයෙන් 1kW සිස්ටම් එකකින් යුනිට් 100-120 අතර ප්‍රමාණයක් ලබාගන්න පුළුවන් මාසෙකට)

මේ දේවල් අනුව මට ලොකු සිස්ටම් එකක් වැඩක් නැති නිසා මගෙ ප්ලෑන් එක 200W විතර සිස්ටම් එකක් හදාගන්න. Lighting සහ වැඩි වොට් ගාණක් නැති විදුලි උපකරණ ටිකක් වෙනුවෙන් භාවිතා කරන්න.

ඉතින් මම තාම බඩු ටික එකතු කරන ගමන් ඉන්නෙ.
මේ තියෙන්නෙ මගෙ ප්ලෑන් එක හා වියදම් විස්තරය. මම කරන්න හදන්නෙ inverter එකක් හරහා 230V අරගෙන change over එකක් හරහා ගෙදරට දෙන එක. 


Unit Price
No. of Units
Price
Buy from
Solar Panel 100W
11500
2
23000
local
Charging Controller
1200
1
1200
ebay
100Ah Deep Cycle Battery
9000
2
18000
Local, Used
220V 1000W inverter
3300
1
3300
ebay
Miscellaneous
2000

2000
Local
Total
47500

Miscellaneous කියල දාල තියෙන්නෙ change over switch, වයර්, ප්ලග්, ටේප්, වගේ දේවල් වලට වියදම් වෙන් කරල. 
පැනල් තියන ෆ්‍රේම් එකට නම් මම ගාණක් දාල නෑ. 

සෝලාර් පැනල්
පැනල් ගැන කිව්වොත්, අපේ වැඩේට ඕනෙ කරන්නෙ Poly crystalline Solar Panels. Mono crystalline ඒව වඩා හොඳ උනත් ලංකාව වගේ රටකට එතරම් විශේෂයක් නෑ. ඒවයෙ මිලත් සාපේක්ෂව වැඩියි. 

10W, 20W, 50W, 70W, 100W, 150W පැනල් වලින් 12V ප්‍රතිදානයකුත්, ඊට වැඩි ඒවායින් 24V ප්‍රතිදානයකුත් ලැබෙනව. ඉතින් මම තෝරා ගත්තෙ 100W Panels 2ක්.  
මම ලංකාවෙ පැනල් විකුණන කිහිප දෙනෙක්ටම කතා කළා. මට හොඳ මිලක් ලැබුනෙ කඩවත ලලිත් මහතාගෙන්. එයාගෙ ඉක්මන් එකේ ඇඩ් එක පහත තියෙනව. චීනයෙන් ගෙන්වල ලද පැනල් තමා ඔහු ලභ තියෙන්නෙ. 
https://ikman.lk/en/ad/solar-panel-70w-for-sale-gampaha
https://ikman.lk/en/ad/20w-solar-panel-for-sale-gampaha


UPDATE (30/07/2017)
මම ගත්ත 150W panel එකක්. පස්සෙ 300W වලට upgrade කරන්න ලබාගෙන. 

Charging Controller
බැටරි හරියට චාර්ජ් කරන්න, පැනල් එක, බැටරිය පරිස්සම් කරගන්න මේක අත්‍යවශ්‍යයි. 
Charging Controller එක ගත්ත ebay එකෙන්. 30A එකක්. මගෙ දැන් සිස්ටම් එකට 10A එකකුත් ඇති. නමුත් ඉස්සරහට වැඩි කරන්න ප්ලෑන් එකක් තියෙන නිසා වැඩි එකක් ගත්ත. EBay එකෙන් තමා ගත්තෙ. 
ගන්නකොට මතක් කරල MPPT වර්ගයෙන් ගන්න. ඒක තමා හොඳ එක. 
Battery Bank
බැටරි ගැන දෙයක් කියන්න තියෙනව. Deep Cycle Batteries තමා මේ වැඩේට හොඳම. ඒව අලුත්ම එකක් රු. 30,000 - 40,000ක් වගේ වෙනව. නමුත් මේ වැඩේට පාවිච්චියෙන් ඉවත දාපු හොඳ කන්ඩිෂන් එකේ තියෙන එකක් ගන්න පුළුවන්. ලොකු සමාගම් වල UPS systems වලින් ඉවත් කරන ඒව මේ වැඩේට ඉහටත් උඩින්.


උඩ කිව්ව ලලිත් මහතා ගාවත් තියෙනව. නමුත් මිල ටිකක් වැඩියි. මට පහත ලින්ක් එක ඊයෙ හම්බුනා. එතන නම් ගාණ ටිකක් අඩුයි. හැබැයි ඒ බැටරි ලොට් එක එන්නෙ මාර්තු වලලු. මම, මට හා මිතුරෙක්ට බැටරි 4ක් pre-order කළා. ඔයාලටත් ඕනෙ නම් දැන්ම මේල් එකක් / කෝල් එකක් දාල බැටරි බුක් කරගන්න. (First Come First Serve දෙන්නෙ. ඒ නිසා ඉක්මන් වෙන තරමට හොඳයි.) මේ ඇඩ් වල හැටියට 8000-9000/= අතර මිලකට 90 හෝ 100Ah බැටරි ගන්න පුළුවන්.
https://ikman.lk/en/ad/deep-cycle-ups-battery-solar-for-sale-colombo
https://ikman.lk/en/ad/deep-cycle-battery-for-solar-for-sale-colombo
UPDATE: ඇඩ් දෙක expire වී ඇත. අලුත් ඇඩ් එකක් දැක්ක ගමන් මම දාන්නම් මෙතනම. 

මම තව හොයනව. මීට අඩු තැනකුත් හොයාගන්න තියෙනවද කියල. 

ඒව හොයා ගන්න බැරි නම් හෝ මිල වැඩි නම් භාවිතයෙන් ඉවත් කරපු Starter Battery එකක් උනත් කමක් නෑ. (වාහන බැටරි) ඒකක් නම් රු. 2000-5000 අතර ගාණකට හොයා ගන්න පුළුවන්.

මේ දෙකේ ප්‍රධාන වෙනස ගැන කිව්වොත්, Deep cycle batteries වල මුලු ධාරිතාවයෙන් 80% විතර භාවිතයට ගන්න පුළුවන් උනාට starter battery එකක පුළුවන් 50%ක් වගේ. (මේ සංඛ්‍යා ගැන නම් මට හොඳම අදහසක් නෑ හැබැයි)
ඒත් එක්කම සෝලාර් වලට මේ දෙජාතියෙන් බැටරි ගන්නව නම් durability හා life time අතින් deep cycle batteries ගොඩක් ඉහළයි. 

12V to 220V Inverter
ඉන්වර්ටරයක් භාවිතා කරන්නෙ නැති නම් අපි වෙනමම wiring එකක් කරගන්න හා 12V වලින් වැඩ කරන උපකරණ ගන්න අවශ්‍ය වෙනව. 12V වැඩ කරන බල්බ්, ෆෑන්, වතුර මෝටර්, ස්ත්‍රික්ක තියෙනව. ඒව ගන්න වෙනව.
ඒක කරදර වැඩක් නිසා මම කරන්නෙ inverter එකක් භාවිතා කරල 12V DC විදුලිය 230V AC වලට හරවන එක. එතකොට change over switch එකක් හරහා මට ඕනෙ වෙලාවට CEB එකෙන් Inverter එකට මාරු වෙන්න පුළුවන්. 

මම මගෙ පැනල් ධාරිතාවය, බැටරි ධාරිතාවය, භාවිතය ගැන හිතල 1000W එකක් තමා ගත්තෙ.  පස්සෙ ඕනෙ උනොත් ඊට වැඩක් එකක් ගන්නව.  වැඩි ලෝඩ් එකක් හයි කළොත් මේකෙ තියෙන ආරක්ෂක විධිවිදාන වලට අනුව මේක ඕෆ් වෙනව. මේකත් ගත්තෙ Ebay එකෙන්. 
තව මේකට උවමනා උපකරණ තමයි change Over Switch, Plugs, Wires වගේ දේවල්.

ගෙදර lighting, fans, TV, Radio, Chargers වගේ දේවල් වලට තමා මම මේක භාවිතා කරන්න බලාපොරොත්තු වෙන්නෙ. Fridge එකට පුළුවනද කියල හරියටම කියන්න බෑ. තව ටිකක් හොයල බලන්න ඕනෙ. මොකද ෆ්‍රිජ් එකේ wattage එක ලොකු ගාණක් නොවුනත් ඒකෙ compressor එකේ starting current එක කොහොමද කියල මම දන්නෙ නැති නිසා. හොයල බලන්න ඕනෙ.

UPDATE (30/07/2017)
Inverter නොවන ශීතකරණ නම් දුවන්නට බැරිය. (starting power එක 1000W වගේ. ඉතින් inverter එක ඕෆ් වෙනව ෆ්‍රිජ් එක ඔන් කළ ගමන්. Inverter ෆ්‍රිජ් දුවන්න පුළුවන් වෙයි. 

මේ තියෙන්නෙ wiring diagram එකක්.



ගණං මිනුම් ටිකක් කරන ගමන් ඉන්නෙ. ඒවයෙ අප්ඩේට් එකකුත් දාන්නම් ඉක්මනටම. 

real system photos එක්ක මේ සම්බන්ධ අප්ඩේට් එකක් එක්ක එන මාසෙ එන්නම්. 

ඔයාලගෙ ගෙදරට එකක් හදාගන්න මොකක් හරි හෙල්ප් එකක් ඕනෙ නම් දෙන්නම්. හැබැයි මම මේ  සම්බන්ධයෙන් ඉහළම තාක්ෂණික දැනුමක් තියෙන කෙනෙක් නෙමෙයි. මමත් හොයමින් ඉගෙනගනිමින් කරන්නෙ. මගෙ දැනුමෙ හැටියට දෙන්න පුළුවන් හොඳම පිළිතුර දෙන්නම්, නැතිනම් අහල / හොයල හරි කියන්නම්. කමෙන්ට් එකක් දාන්න ගැටළුවත් එක්ක.  

පහත කමෙන්ට් වල ඉන්න Thiwanka Wimalasooriya මේ සම්බන්ධයෙන් හොඳ දැනුමැත්තෙක්. ඔහුගෙනුත් උපදෙස් ගන්න පුළුවන්. http://twimalasuriya.blogspot.com මේ තියෙන්නෙ ඔහුගෙ බ්ලොග් එක.


UPDATE (30/07/2017)
දැන් ඔක්කොම කොටස් මිලට අරගෙන තියෙන්නෙ. වයර් සහ ස්විච් ටික ගත්තම වැඩේ පටන් ගන්න පුළුවන්. මම අලුතින්ම පෝස්ට් එකක් දාන්නම් ආපහු.